उहाँका अनुसार पुल निर्माण भएपछि नागरिकको जीवनस्तरमा योगदान दिनेछ । गाउँमा खाद्यान्न, कृषिजन्य सामग्री र व्यापारिक सामग्री ओसारपसार गर्न, सहजरुपमा यात्रा गर्न ठूलो सघाउ पुग्ने विश्वास लिइएको छ ।

इलाइट कन्ट्रक्सन प्रालिले २०७६ फागुन ११ गते सम्झौता गरी निर्माणको जिम्मेवारी लिएर काम सुरु गरेको छ । रु सात करोड ७३ लाख छ हजार सात सय ७१ को लागतमा निर्माण सम्पन्न भएको पुलको लम्बाइ ६४ दशमलव १० मिटर र चौडाइ ११ मिटर सडक पूर्वाधार विकास कार्यालय पाल्पाका प्रमुख अरुण गुप्ताले जानकारी दिनुभयो । रु आठ करोड १२ लाख २५ हजार छ सय ४३ को लागतमा ठेक्का आह्वान भएको थियो ।

यस पुलबाट रामपुर नगरपालिका वडा नं १, २, ३ र निस्दी गाउँपालिका विभिन्न वडाका स्थानीयवासी प्रत्यक्ष लाभान्वित हुनेछन् । यहाँ पक्की पुल नहुँदा गाउँमा उत्पादित कृषिउपज वर्षायाममा रामपुर बजारमा ढुवानी गर्न नपाउँदा स्थानीयले निकै सास्ती खेप्दै आइरहेका थिए ।

वर्षायाममा पुल अभावकै कारण मजदुर व्यवस्थापन गरी झोलुङ्गेबाट वारीपारी सामान ओसारपसार गर्न स्थानीय बाध्य थिए । अब भने वर्षौँदेखि भोग्दै आइरहेको समस्या समाधानका लागि अन्त्य भएको निस्दीका स्थानीय यमबहादुर मश्राङ्गीले प्रतिक्रिया दिनुभयो ।