र्हेटौंडा । बागमती प्रदेश प्रहरी कार्यालयले राखेका सुझाव पेटिकाहरूमा १ महिनामा ६ वटामात्र सुझाव प्राप्त भएको छ ।बागमती प्रदेशका प्रहरी विरुद्धको गुनासो तथा सुझाव संकलन गर्न विभिन्न जिल्लाका ३१ स्थानीय तहमा राखिएको पेटिकामा २ स्थानीय तहबाट ६ वटा सुझाव पत्र प्राप्त भएको हो । कार्यालयले असोज १ गते राखेको पेटिका कार्तिक १ गते खोल्दा धादिङको निलकण्ठ नगरपालिकामा रहेको पेटिकाबाट ५ र हेटौंडा उपमहानगरमा रहेको पेटिकामा एक मात्रै सुझाव पत्र प्राप्त भएको प्रदेश प्रहरी कार्यालयका प्रवक्ता प्रहरी वरिष्ठ उपरीक्षक सुदीप गिरीले बताए । कार्यालयले पहिलो चरणमा प्रदेशका सबै महानगर, उपमहानगर, नगरपालिका र सदरमुकाम रहेको गाउँपालिका गरी ३१ स्थानीय तहमा सुझाव संकलन हुने अपेक्षासहित सुझाव पेटिका राखेपनि सर्वसाधारणमा भने यसप्रति कुनै आकर्षण नदेखिएको हो। आफुहरूले दिएको सुझाव प्रहरी नेतृत्वले कार्यान्वयन गर्ने विश्वास नहुँदा सुझाव पेटिका कम सुझाव पत्र प्राप्त भएको हुनसक्ने एक सर्वसाधारणको भनाइ छ ।