चितवन । चितवन मेडिकल कलेज (सिएमसी) शिक्षण अस्पतालमा वर्षेनी १७ हजार मनोरोगका बिरामीको उपचार हुँदै आएको छ । अस्पतालमा गत आर्थिक वर्षमा १६ हजार ८३४ जना मनोरोगका बिरामीको उपचार भएको हो । विश्व आत्महत्या रोकथाम दिवसको अवसर पारेर अस्पतालले आज आयोजना गरेको पत्रकार सम्मेलनमा अस्पतालका प्रमुख प्रशासक प्रताप देवकोटाले दैनिक सरदर ८५ जना बिरामी आउने गरेको बताउनुभयो । उहाँका अनुसार गत आर्थिक वर्षमा मात्रै १७ हजार ८३४ जनाको उपचार भएको र जसमध्ये ५०९ जना भर्ना भएरै सेवा लिएका थिए ।

हालसम्म एक लाख ५० हजार बिरामीले अस्पतालबाट सेवा लिएका छन् । अस्पताला आउने मनोरोगका बिरामी मध्ये ५५ प्रतिशत महिला र ४५ प्रतिशत पुरुष रहेका छन् । उपत्यका बाहिर सबैभन्दा धेरै मनोरोगका बिरामीको उपचार गर्दै आइरहेको देवकोटाको भनाई छ । पत्रकार सम्मेलनमा कार्यपत्र प्रस्तुत गर्दै मनोरोग विशेषज्ञ डा.खगेन्द्र काफ्लेले आत्महत्याको मुख्य कारण नै मानसिक रोग भएको बताउनुभयो । उहाँले नेपाल प्रहरीको तथ्यांकलाई उधृत गर्दै आर्थिक वर्ष २०८०/८१ मा नेपालमा ७ हजार २२३ जनाले आत्महत्या गरेको जानकारी दिनुभयो ।

कोभिड–१९ को समयमा धेरै नेपालीलाई मनोरोग भएको उहाँको भनाई छ । २०७९/८० मा नेपालमा ६ हजार ९९३ जना आत्महत्या गरेका थिए । सिएमसीले २०६४ भदौदेखि नै मनोरोगको उपचार सुरु गरेको थियो । सुरुमा आकस्मिक कक्षमा दुई वटा शैयाबाट सुरु गरिएको यो सेवा अहिले ३० शैयाको बनेको छ । विशेषज्ञ चिकित्सक, आधुनिक उपकरणसहितको उपचारको सफलताको दर उच्च रहेकै कारण अस्पतालमा मनोरोगको उपचार गर्न आउनेको संख्या दिनानुदिन बढ्दै गएको उहाँको भनाई छ ।

अस्पतालमा औषधिको प्रयोगसँगै विद्युतीय उपचार (इ.सिटी), परामर्श, साइकोथेरापी विधिको प्रयोग गरेर उपचार गर्ने गरिएको छ भने त्यसका अलवा बिरामीलाई मनोरञ्जनात्मक (नाँचगान) आध्यात्मिक, योग समेत गराएर उपचार गर्ने गरिएको देवकोटाले जानकारी दिनुभयो । कार्यक्रममा मनोरोग विशेषज्ञ प्रा.डा.सिपी सेढाई र डा.शैलेन्द्रराज अधिकारीले मनोरोगका लक्षण, प्रकार र उपचार प्रक्रियाका बारेमा जानकारी दिनुभएको थियो । उहाँहरुले समयमा नै मनोरोग पत्ता लगाएर उपचार गरेमा निको हुने बताउनुभयो ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै