र्हेटौँडा । मकवानपुरको मनहरी गाउँपालिकामा वडास्तरीय फुटबल प्रतियोगिता आजबाट  सुरु हुने भएको छ।नजिकिदै गरेको शुभ दीपावलीको अवसरमा  सहीद प्रीतकुमार मोक्तान स्मृति प्रतिष्ठान मनहरी गाउँपालिकाको आयोजनामा प्रतियोगिता हुन लागेको हो । सहीद प्रीतकुमार मोक्तानको योगदानलाई जीवन्त राख्नुको साथै भ्रातृत्वको सम्बन्ध र फुटबलको विकासको लागि खेल आयोजना गरिएको प्रतियोगिता संयोजक हेलिस मोक्तानले जानकारी दिएका छन् । आज हुने उदघाटन  खेल परिवर्तनशिल युवा क्लव र च्यापल यूथ क्लवको बीचमा हुने आयोजकले जनाएको छ । बिजेताले नगद २० हजार तथा उपबिजेताले १० हजारसहित ट्रफी र प्रमाणपत्र प्राप्त गर्नेछ ।हरेक खेलको म्यान अफ द म्याच र विधागत उत्कृष्ट खेलाडीलाई पुरस्कारको ब्यवस्था गरिएको आयोजकले जानकारी दिएको छ । प्रतियोगिताको लागि करिब साढे २ लाख खर्च हुने अनुमान रहेको छ ।मनहरी गाउँपालिका १ नम्बर वडा कार्यालयसहित विभिन्न व्यक्ती तथा संस्थाबाट आर्थिक सहयोग प्राप्त भएको संयोजक मोक्तानले बताए। प्रतियोगितामा १६ टिमको  सहभागिता रहेको जनाइएको छ।