चितवन । जाडो मौसममा लुगलुग काप्दै आउने बिरामी र बिरामीका कुरुवालाई केही भएपनि राहत होस् भन्ने उद्देश्यले भरतपुर अस्पतालमा ‘कपडा बैंक’ स्थापना गरिएको छ । दिनसक्नेले कपडा दान गर्ने र विपन्नले लैजान सक्ने गरी बैंक स्थापना गरिएको हो । भरतपुर अस्पतालका प्रमुख मेडिकल सुपरिटेण्डेण्ट प्रा.डा.कृष्णप्रसाद पौडेलका अनुसार कपडा पर्याप्त नभएका विपन्न वर्गका बिरामी र कुरुवालाई केही भएपनि राहत होस् भनेर बैंक स्थापना गरिएको बताउनुभयो ।

उहाँले घरमा रहेका दान गर्न मिल्ने कपडाहरु पनि बैंकमा राख्न सकिने बताउनुभयो । उहाँले भन्नुभयो “कतिपय कपडा नलगाई पुराना भएका हुन्छन् । कतिपय सानो वा ठूला भएका हुन्छन् । त्यस्ता कपडा यहाँ दान गर्न सकिन्छ ।” अस्पतालका सर्जन डा. दीपेन्द्र न्यौपानेको नेतृत्वमा रामहरि ढकाल र प्रभा गुरुङ रहेको समिति बनाईएको छ । डा. न्यौपानेले सक्नेले दान गर्ने र विपन्न वर्गले लैजाने गरी बैंक सञ्चालन गरिएको बताउनुभयो ।

उहाँले नयाँ कपडा किनेर पनि दान गर्न सकिने बताउनुभयो । उहाँले भन्नुभयो “ग्रामीण भेगका विपन्न बिरामी र कुरुवा लुगलुग काप्दै आउनुहुन्छ, सबैलाई हामीले दिएर मात्रै पुग्दैन, सबैले दान गर्न मिलोस् भनेर बैंक सञ्चालन ग¥यौं ।”

दान गर्न चाहनेले सिंधै लगेर बैंकमा कपडा राख्न सक्ने व्यवस्था गरिएको छ । अलमल परेमा आफूहरुलाई सम्पर्क गर्न सक्ने डा. न्यौपानेको भनाई छ । बैंकमा कपडा दान गर्ने क्रम शुरु भएको छ । कतिपयले नयाँ कपडा किनेर समेत दान गर्नुभएको छ ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै