नवलपुर । नवलपुरको गैँडाकोटमा रहेका करिब साढे तीन हजार किशोरीलाई पाठेघरको मुखको क्यान्सर विरुद्धको खोप लगाइने भएको छ । यहाँका ५६ वटा खोप केन्द्रबाट तीन जार चार सय ६६ किशोरीलाई एचपिभी खोप लगाउन लागिएको आज आयोजित पत्रकार सम्मेलनमा जानकारी दिइएको छ । गैँडाकोट नगरपालिक भित्रका विद्यालयमा कक्षा ६ देखि १० सम्म अध्ययनरत तीन हजार ३१६ विद्यार्थी तथा विद्यालय बाहिर भएका एक सय ५० किशोरी गरी तीन हजार ४६६ किशोरीलाई खोप लगाउने तयारी गरिएको जनस्वास्थ्य निरीक्षक माधव आचार्यले बताउनुभयो ।

पालिकामा खोपको गुणस्तर कायम हुने गरी तयारी थालिएको भन्दै ५६ वटा खोप केन्द्रमा ६० खोप कार्यकर्ता एवम् १२० स्वयम्सेवक परिचालन गरिएको उहाँले जानकारी दिनुभयो । निःशुल्क प्रदान गरिने एचपिभी खोप आगामी वर्षदेखि नियमित रुपमा फागुन महिनामा विद्यालयका कक्षा ६ मा अध्ययनरत तथा विद्यालय बाहिरका १० वर्षका किशोरीहरुलाई लगाइने आचार्यको भनाइ छ । आचार्यले पाठेघरको मुखको क्यान्सरलाई रोकथाम गर्ने उद्देश्यले गैँडाकोटमा माघ २८ गतेसम्म खोप अभियान सञ्चालन गर्न लागिएको बताउनुभयो । विश्वभर महिलामा लाग्ने क्यान्सरमध्ये ह्युमन प्यापिलोमा भाइरस (एचपीभी) बाट हुने क्यान्सर चौथो नम्बरमा पर्ने आचार्यको भनाइ छ ।

हरेक दिन सात जनालाई यो रोग लाग्ने गरेकोमा चार जनाको यस रोगबाट मृत्यु हुनेगरेको उहाँको भनाइ छ । किशोरीहरुको बायाँ पाखुरामा एचपिभी विरुद्धको ‘सिकोलिन’ खोप शुन्य दशमलब पाँच एमएल लगाइने भन्दै आचार्यले यो खोप सुरक्षित भएकाले अभियानमा सबै किशोरीहरुले लगाउनुपर्ने बताउनुभयो । पाठेघरको क्यान्सरलाई निवारण गर्ने लक्ष्यका साथ सरकारले नौ वर्ष अघि नै कास्की र चितवनमा यो खोपको सफल परीक्षण गरिसकेको आचार्यले बताउनुभयो । ह्युमन प्यापिलोमा भाइरसका कारण महिलामा पाठेघरको मुखको क्यान्सरको जोखिम बढ्ने र यसले मलद्वार, योनी र घाँटीको पछाडिको भागमा छिटो आक्रमण गर्ने स्वास्थ्यकर्मीहरु बताउँछन् ।

महिलाको पाठेघरको मुखको क्यान्सर रोकथामका लागि प्राथमिक चरणमा खोप, दोस्रो चरणमा परीक्षणबाट रोग पहिचान तथा तेस्रो चरणमा उपचार पद्धती रहेको आचार्यको भनाइ छ । ३० देखि ४९ वर्षसम्मका सबै महिलाले पाँच वर्षको अन्तरालमा पाठेघरको मुखको परीक्षण गर्नुपर्ने भन्दै आचार्यले गैँडाकोट नगरपालिकाको आधारभूत अस्पतालमा हरेक बिहीबार निःशुल्क रुपमा भिआईए परीक्षण गरिने बताउनुभयो ।

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै

उत्कृष्ट नतिजा दिलाउने अङ्कुरम् एकेडेमीका विषयगत शिक्षक सम्मानित