भरतपुर । चितवनस्थित आरम्भ कलेजको आयोजनामा कक्षा ११ र १२ मा अध्ययनरत विद्यार्थीहरूलाई लक्षित गर्दै ‘आरम्भ कप २०८२’ बास्केटबल प्रतियोगिता आयोजना हुने भएको छ। विद्यार्थीहरूको शारीरिक तन्दुरुस्ती, मानसिक क्षमता तथा नेतृत्व विकासलाई प्रवर्द्धन गर्नुका साथै खेलभावना, अनुशासन र समूहगत सहकार्यको संस्कार विकास गर्ने उद्देश्यले उक्त प्रतियोगिता सञ्चालन गर्न लागिएको कलेजले जनाएको छ।

प्रतियोगिता आगामी माघ १८ गतेदेखि २२ गतेसम्म आरम्भ कलेजको आफ्नै बास्केटबल कोर्ट, भरतपुर–११ मा आयोजना हुनेछ। आयोजक समितिका अनुसार प्रतियोगितामा ३५ भन्दा बढी टिमहरूको सहभागिता गराउने लक्ष्य राखिएको छ। प्रतियोगितामा चितवनलगायत विभिन्न जिल्लाका कलेजहरूबाट कक्षा ११ र १२ मा अध्ययनरत विद्यार्थी खेलाडीहरूको सहभागिता रहनेछ।

आयोजकले प्रतियोगिताका सबै खेलहरू नेपाल बास्केटबल संघ (Nepal Basketball Association – NeBA) का आधिकारिक नियमअनुसार सञ्चालन गरिने जानकारी दिएको छ। खेललाई निष्पक्ष, व्यवस्थित र व्यावसायिक बनाउन अनुभवी तथा लाइसेन्स प्राप्त रेफ्री, प्राविधिक समिति र स्वयंसेवकहरूको सक्रिय व्यवस्थापन गरिएको आयोजक समितिले जनाएको छ।

प्रतियोगितालाई थप प्रतिस्पर्धात्मक र आकर्षक बनाउन आकर्षक पुरस्कार राशिको व्यवस्था गरिएको छ। प्रतियोगितामा प्रथम स्थान हासिल गर्ने टिमलाई नगद रु. १५,००० र दोस्रो स्थान हासिल गर्ने टिमलाई नगद रु. १०,००० पुरस्कार प्रदान गरिनेछ। त्यसैगरी उत्कृष्ट व्यक्तिगत प्रदर्शनका आधारमा Most Valuable Player (MVP) र Highest Scorer लाई विशेष सम्मान तथा पुरस्कार प्रदान गरिने आयोजकले जानकारी दिएको छ। प्रतियोगितामा सहभागी सबै टिम तथा विजेता टिमलाई प्रमाणपत्र समेत प्रदान गरिनेछ।

प्रतियोगिताको तयारीस्वरूप पहिलो दिन ओरिएन्टेशन कार्यक्रम सम्पन्न भइसकेको छ। उक्त कार्यक्रममा सहभागी टिमका टिम लिडर तथा सदस्यहरूको अन्तिम नामावली पुष्टि गर्नुका साथै प्रतियोगिताका नियम, खेल तालिका, अनुशासन, स्वास्थ्य तथा सुरक्षा व्यवस्थासम्बन्धी विस्तृत जानकारी प्रदान गरिएको थियो।

आरम्भ कलेजले शैक्षिक गतिविधिसँगै यस्ता खेलकुद प्रतियोगिताहरूले विद्यार्थीहरूको सर्वाङ्गीण विकासमा महत्वपूर्ण भूमिका खेल्ने विश्वास व्यक्त गरेको छ। आयोजक समितिले विद्यार्थी, अभिभावक तथा खेलप्रेमी दर्शकहरूलाई प्रतियोगिता अवलोकन गरी खेलाडीहरूको मनोबल र हौसला बढाउन आग्रह गरेको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै