काठमाडौं । नेपाली काँग्रेसले संसदीय दलको नेता छान्न नसक्दा आलोचना शुरु भएको छ ।
निर्वाचन सकिएको यति लामो समयसम्म पनि संसदीय दलको नेता छान्न नसकेपछि काँग्रेस सभापति गगन थापा र उपसभापति विश्वप्रकाश शर्माको आलोचना शुरु भएको हो । सभापति थापा र शर्मालाई संसदीय दलको नेता छान्न नसकेकोमा सामाजिक सञ्जाल र मिडियामा प्रश्न गर्न थालिएको छ ।
निर्वाचनको प्रक्रिया रोकेर सर्वसम्मत चयनका लागि प्रयास गरिरहेको बताइए पनि संसदीय दलको नेता चयनले नेताहरुको आपसी शक्तिसंघर्ष छताछुल्ल भएको छ ।
कांग्रेस परम्परागत रुपमै विभिन्न गुटहरुमा विभाजित पार्टी भएकोले यो नयाँ कुरा नभए पनि यसअघि यस्तै प्रवृतिविरुद्ध लडेर विशेष महाधिवेशन गरेर आएको नेतृत्व पनि उस्तै अवस्थाबाट गुज्रिदा काँग्रेस बदलिएको छैन भन्ने प्रमाणित गरिरहेको विश्लेषण गरिएको छ ।
शुक्रबार बसेको कांग्रेस केन्द्रीय कार्यसम्पादन समितिको बैठकले निर्वाचन स्थगित गरेको थियो । यससँगै बैठकले सर्वसम्मत रूपमा दलको नेता चयन गर्न वार्ता टोली पनि गठन गरेको छ । कांग्रेसले उपसभापति विश्वप्रकाश शर्माको नेतृत्वमा वार्ता टोली गठन गरेको हो। वार्ता टोलीमा उपसभापति पुष्पा भुसाल, महामन्त्री प्रदीप पौडेल, गुरुराज घिमिरे र निर्वाचन समितिका संयोजक तथा सहमहामन्त्री प्रकाश स्नेही सदस्य रहेका छन् ।
संसदीय दलको नेता चयनमा सभापति थापा र उपसभापति शर्माबीच पनि तालमेल नमिलेको देखिएको छ । थापा आफु निकट नेता मोहन आचार्यलाई संसदीय दलको नेता बनाउन चाहेको बुझिएको छ भने शर्माले भीष्मराज आङ्देम्बेलाई बनाउन चाहेको बुझिएको छ । यसमा बाधकको रुपमा नेता अर्जुननरसिंह केसी उभिएका छन् । नाताले सभापति थापाका ससुरा रहेका केसीलाई देउवा पक्षका सांसदको समर्थन रहेको बताइएको छ ।
फागुन २१ मा सम्पन्न निर्वाचनमा कांग्रेसबाट ३८ मध्ये प्रत्यक्षतर्फ १८ र समानुपातिकतर्फ २० जना निर्वाचित भएका छन् । कांग्रेसमा २०६४ को निर्वाचनपछि संसदीय दलको नेता सर्वसम्मत चयन भएको छैन । निर्वाचनबाटै नेता छानिने गरेका छन् । २०७९ को निर्वाचनपछि महामन्त्री गगन थापा र शेरबहादुर देउवाबीच प्रतिस्पर्धा भएको थियो, जसमा देउवा विजयी भएका थिए । प्रमुख प्रतिपक्षी दल रहेको कांग्रेसले दलको नेता चयन गर्न नसक्दा संवैधानिक परिषद्ले पूर्णता पाउन सकेको छैन ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.