चितवन । जिल्लाका छ वटा स्थानीय तहबाट करदाता सेवा केन्द्र सञ्चालनमा ल्याइएको छ। भरतपुर महानगरपालिकाबाहेक पाँच नगरपालिका र एउटा गाउँपालिकाबाट सेवा सुरु गरिएको हो। नेपाल सरकारको कात्तिक १७ गतेको निर्णयअनुसार खैरहनीस्थित करदाता सेवा केन्द्र हटाइएपछि त्यहाँबाट प्रदान हुने सेवा सम्बन्धित स्थानीय तहमार्फत सञ्चालन गर्ने व्यवस्था गरिएको हो।

आन्तरिक राजस्व कार्यालय भरतपुरका प्रमुख पुण्यविक्रम खड्काका अनुसार रत्ननगर, कालिका र राप्ती नगरपालिकामा माघ महिनादेखि सेवा सुरु गरिएको थियो। त्यसपछि खैरहनी नगरपालिकाबाट सेवा विस्तार गरिएको हो। चैत १९ गते माडी नगरपालिकाबाट सेवा सुरु गरिएको थियो भने आजदेखि इच्छाकामना गाउँपालिकाबाट पनि सेवा उपलब्ध गराइने भएको छ।

यससँगै आन्तरिक राजस्व विभागका सूचना प्रविधि निर्देशक पदमबहादुर भण्डारीले सम्बन्धित छवटै पालिकाका अधिकृत तथा सहायक स्तरका कर्मचारीलाई एकदिने तालिम प्रदान गरेका छन्। तालिममा प्रविधि प्रयोग, सेवा प्रवाह तथा कर प्रशासनसम्बन्धी विषयमा जानकारी गराइएको थियो।

अब स्थानीय तहहरूले व्यक्तिगत तथा व्यावसायिक प्यान दर्ता गर्न, करदाता विवरण संशोधन गर्न, आयकरसम्बन्धी कारोबार बन्द गर्न, मूल्य अभिवृद्धि कर दर्ताका लागि सिफारिस गर्न र कर चुक्ता प्रक्रियामा सहजीकरण गर्न सक्नेछन्। साथै करदाता शिक्षा कार्यक्रम सञ्चालन गर्न पनि उनीहरूले आन्तरिक राजस्व कार्यालयसँग समन्वय गर्नेछन्।

यद्यपि करदाताको अनुगमन, अनुसन्धान तथा कर परीक्षणजस्ता कार्य भने आन्तरिक राजस्व कार्यालय भरतपुरबाटै गरिनेछ। भरतपुरमै कार्यालय रहेको कारण महानगरपालिकामा छुट्टै सेवा केन्द्र स्थापना गरिएको छैन। हाल उक्त कार्यालयमा ७४ हजार करदाता दर्ता रहेका छन्। चालु आर्थिक वर्षका लागि २९ अर्ब ८१ करोड ७७ लाख राजस्व संकलन गर्ने लक्ष्य राखिएकोमा अहिलेसम्म १८ अर्ब पाँच करोड ५० लाख संकलन भइसकेको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै