चितवन ।  चितवनमा यस वर्ष पनि भव्य रूपमा बुद्ध जयन्ती मनाइने भएको छ। बौद्धधर्म सेवा समिति महाबौद्ध गुम्बा तीनखोलेले आगामी वैशाख २८ गते २५७० औँ बुद्ध जयन्ती विविध कार्यक्रमका साथ मनाउने तयारी गरेको जानकारी आज भरतपुरमा आयोजित पत्रकार सम्मेलनमार्फत दिएको हो।

समितिका अनुसार हरेक वर्षझैँ यस पटक पनि महाबौद्ध गुम्बा परिसरमा धार्मिक तथा सांस्कृतिक कार्यक्रमहरू आयोजना गरिनेछन्। कार्यक्रमलाई सफल बनाउन आवश्यक तयारी अन्तिम चरणमा पुगेको जनाइएको छ। आयोजकहरूले गुम्बा परिसरको सरसफाइ कार्य सम्पन्न भइसकेको र भोलिदेखि गुम्बा सजावट तथा श्रृंगारको काम गरिने बताएका छन्।

बुद्ध पूर्णिमाका दिन बिहानैदेखि धार्मिक अनुष्ठानहरू सुरु हुनेछन्। कार्यक्रमअन्तर्गत शुद्धिकरण पूजा, शान्ति पदयात्रा, बुद्धको मूर्तिमा पवित्र जल स्नान अर्पण तथा त्रिरत्न बुद्ध स्तुति पूजा गरिनेछ। साथै, बौद्ध आचार्य लोपेन रिन्छेन दोर्जे (सन्जिव)द्वारा धर्मदेशनासम्बन्धी विशेष प्रवचन पनि प्रदान गरिनेछ, जसले सहभागीहरूलाई बौद्ध दर्शनबारे गहिरो ज्ञान दिने अपेक्षा गरिएको छ।

शान्ति पदयात्रा बिहान ७ बजे महाबौद्ध गुम्बा तीनखोलेबाट सुरु हुनेछ। पदयात्रा प्रहरी शिक्षालय, विशालचोक, दिपेन्द्रचोक, वीरेन्द्र क्याम्पस गेट, लायन्सचोक, सहिदचोक, मिलनरोड, लिलाचोक, रामेश्वर मन्दिर, सब्जिमण्डी हुँदै बुद्धटोल पुगेर पुनः गुम्बा परिसरमा समापन गरिनेछ।

यस कार्यक्रममार्फत शान्ति, सहिष्णुता र मानवता सम्बन्धी बुद्धका सन्देशहरू समाजमा फैलाउने उद्देश्य राखिएको आयोजकले बताएका छन्। साथै, स्थानीय समुदायको सक्रिय सहभागिताले कार्यक्रम अझ प्रभावकारी र प्रेरणादायी हुने विश्वास गरिएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै