चितवन । नेपाल प्रहरीले देशभर व्यापक रूपमा प्रहरी अधिकृतहरूको सरुवा गरेको छ । प्रहरी प्रधान कार्यालयले शुक्रबार सार्वजनिक गरेको सूचीअनुसार जिल्ला प्रहरी कार्यालय चितवनका प्रमुख प्रहरी उपरीक्षक (एसपी) गोविन्द पुरीको सरुवा गरिएको हो । उनलाई नेपाल प्रहरी प्रदेश कार्यालय अन्तर्गत अपराध अनुसन्धान शाखामा पठाइएको छ । साथै, उनी काजस्वरूप नेपाल प्रहरी प्रधान कार्यालयको अपराध अनुसन्धान विभागमा रहने जनाइएको छ ।

चितवन प्रहरीको नेतृत्व अब एसपी रामेश्वर पौडेलले सम्हाल्ने भएका छन् । उनी हाल राष्ट्रिय प्रहरी प्रशिक्षण प्रतिष्ठानको तालिम शाखामा कार्यरत थिए । लामो समयदेखि प्रहरी प्रशिक्षण र व्यवस्थापन क्षेत्रमा अनुभव हासिल गरेका पौडेलको आगमनसँगै चितवन प्रहरीमा नयाँ कार्यशैली र रणनीति लागू हुने अपेक्षा गरिएको छ ।

त्यसैगरी, जिल्ला प्रहरी कार्यालय चितवनमा कार्यरत प्रहरी नायब उपरीक्षक (डीएसपी) रविन्द्र खनालको पनि सरुवा गरिएको छ । उनको स्थानमा डीएसपी चन्द्र भूषण यादव आउने भएका छन् । प्रहरी प्रशासनमा भएको यो फेरबदललाई नियमित प्रशासनिक प्रक्रिया अन्तर्गत गरिएको प्रहरी प्रधान कार्यालयले जनाएको छ ।

प्रहरी प्रधान कार्यालयका अनुसार एकैदिन देशभर १४९ जना डीएसपी र ४६ जना एसपीको सरुवा गरिएको हो । संगठनभित्र कार्यक्षमता अभिवृद्धि, प्रशासनिक सन्तुलन तथा आवश्यक जनशक्ति व्यवस्थापनका लागि समय–समयमा यस्तो सरुवा गरिने गरिन्छ ।

चितवनमा नयाँ प्रहरी नेतृत्व आएपछि जिल्लाको शान्ति सुरक्षा, अपराध नियन्त्रण तथा ट्राफिक व्यवस्थापनमा थप प्रभावकारी काम हुने अपेक्षा गरिएको छ ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै