चितवन । जिल्ला प्रहरी कार्यालय चितवनमा आर्थिक वर्ष २०८२/०८३ मा अपराधसम्बन्धी १ हजार ८७६ वटा मुद्दा दर्ता भएका छन्। अघिल्लो आर्थिक वर्षको तुलनामा चोरी, अभद्र व्यवहार, आत्महत्या, जबर्जस्ती करणी, विद्युतीय अपराधलगायतका मुद्दा घटे पनि लागुऔषध र बैंकिङ कसुरसम्बन्धी अपराधमा उल्लेख्य वृद्धि भएको प्रहरीले जनाएको छ।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार दर्ता भएका मुद्दामध्ये १ हजार १९२ वटा फर्छ्योट भइसकेका छन् भने ५८४ वटा अझै विचाराधीन छन्। सबैभन्दा बढी आत्महत्यासम्बन्धी ४७४ वटा मुद्दा दर्ता भएका छन्। त्यसपछि लागुऔषधसम्बन्धी ३४१, सार्वजनिक हितविरुद्धका कसुरसम्बन्धी २६४, बैंकिङ कसुरसम्बन्धी १९२, सवारी ज्यानसम्बन्धी ९८, चोरीसम्बन्धी ८८, करणीसम्बन्धी ४५ तथा कर्तव्य ज्यानसम्बन्धी ३ वटा मुद्दा रहेका छन्।
स्थानीय तहअनुसार सबैभन्दा धेरै अपराधका घटना भरतपुर महानगरपालिकामा १ हजार १६० वटा दर्ता भएका छन्। त्यसपछि कालिका नगरपालिकामा २३२, रत्ननगरमा १४३, माडीमा ९९, खैरहनीमा ९३, इच्छाकामनामा ७९ र राप्ती नगरपालिकामा ७० वटा मुद्दा दर्ता भएका छन्।
प्रहरीको तथ्यांकअनुसार अघिल्लो आर्थिक वर्षको तुलनामा लागुऔषधसम्बन्धी अपराध ४९ प्रतिशत र बैंकिङ कसुर ४६ प्रतिशतले बढेको छ। सवारी ज्यानसम्बन्धी मुद्दा ८ प्रतिशत तथा ठगीसम्बन्धी मुद्दा ३ प्रतिशतले वृद्धि भएका छन्।
गत आर्थिक वर्षमा अदालतबाट दोषी ठहर भएका ८७७ जनालाई पक्राउ गरिएको छ, जुन अघिल्लो वर्षभन्दा २९४ जनाले बढी हो। पक्राउ परेकाहरूको कुल कैद अवधि १२२ वर्ष ८ महिना २० दिन रहेको प्रहरीले जनाएको छ। यस अवधिमा ६ करोड ७६ लाख ४७ हजार ६१९ रुपैयाँ जरिवाना असुल गरिएको एसपी पौडेलले जानकारी दिए।
प्रहरीले सोही अवधिमा हराएका ४१० वटा मोबाइल फेला पारेर सम्बन्धित व्यक्तिलाई फिर्ता गरेको छ। साथै, जिल्लाभर १२ हजार ८३४ पटक गस्ती सञ्चालन गरिएको, ९१ वटा बन्द, विरोध र र्याली व्यवस्थापन गरिएको तथा प्रहरीको ‘१००’ नम्बरमा ४५ हजार ९३७ वटा फोन प्राप्त भएको तथ्यांक पनि सार्वजनिक गरिएको छ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.