रत्ननगर । पूर्वी चितवनको रत्ननगर नगरपालिकाले आर्थिक वर्ष २०८२/०८३ का बाँकी रहेका विकास आयोजनाहरू निर्धारित समयसीमाभित्र गुणस्तरीय रूपमा सम्पन्न गर्ने लक्ष्यसहित निर्माण व्यवसायी तथा सरोकारवालासँग समीक्षा तथा अन्तरक्रिया कार्यक्रम आयोजना गरेको छ।

नगरपालिकाका प्रमुख प्रशासकीय अधिकृत प्रकाश खनालको अध्यक्षतामा सम्पन्न कार्यक्रममा नगर प्रमुख प्रलाद सापकोटा, प्राविधिक कर्मचारी, निर्माण व्यवसायी तथा सम्बन्धित पक्षहरूको सहभागिता रहेको थियो। कार्यक्रममा हाल सञ्चालनमा रहेका विभिन्न विकास योजनाको प्रगति, देखिएका चुनौती तथा समयमै सम्पन्न गर्न आवश्यक समन्वयका विषयमा विस्तृत छलफल गरिएको थियो।

समीक्षा बैठकमा नगरपालिकाका गौरवका आयोजनाका रूपमा रहेका रत्ननगर हरियाली पार्क, लौरीघोल ताल संरक्षण परियोजना, सौराहा सडक स्तरोन्नति, विभिन्न स्थानका नाला निर्माण, बछौली माध्यमिक विद्यालय भवन निर्माण तथा विभिन्न वडामा सञ्चालन भइरहेका कालोपत्रे सडक योजनाको प्रगतिबारे विस्तृत जानकारी प्रस्तुत गरिएको थियो। आयोजनाहरूको हालसम्मको उपलब्धि, बाँकी काम र निर्माण प्रक्रियामा देखिएका समस्या तथा समाधानका उपायबारे सहभागीहरूबीच खुला छलफल भएको थियो।

कार्यक्रमलाई सम्बोधन गर्दै नगर प्रमुख प्रलाद सापकोटाले विकास निर्माणका काममा कुनै पनि प्रकारको ढिलासुस्ती स्वीकार्य नहुने स्पष्ट पार्दै चालु आर्थिक वर्षभित्र सबै आयोजना सम्पन्न गर्न निर्माण व्यवसायीलाई पहिलो त्रैमासिकदेखि नै कामको गति बढाउन निर्देशन दिए। उनले निर्माण कार्यको गुणस्तर कायम राख्दै नियमित अनुगमन, समयमै सामग्री व्यवस्थापन तथा प्राविधिक मापदण्डको पूर्ण पालना गर्न आग्रह गरे।

निर्माण व्यवसायीहरूले भने निर्माण सामग्रीको आपूर्ति, मौसमको प्रतिकूलता, प्राविधिक प्रक्रियाका केही जटिलता तथा अन्य व्यवहारिक समस्याका कारण काम प्रभावित भएको जानकारी गराउँदै नगरपालिकाको थप सहजीकरण आवश्यक रहेको धारणा राखेका थिए।

जवाफमा नगर प्रमुख सापकोटाले निर्माण व्यवसायीहरूले उठाएका समस्याप्रति नगरपालिका गम्भीर रहेको उल्लेख गर्दै आवश्यक समन्वय, सहजीकरण तथा प्राविधिक सहयोग उपलब्ध गराउने प्रतिबद्धता व्यक्त गरे। उनले विकास आयोजना समयमै सम्पन्न हुनु नगरवासीको अपेक्षा र नगरपालिकाको प्राथमिकता दुवै भएकाले सबै पक्ष जिम्मेवार र जवाफदेही भएर काम गर्नुपर्नेमा जोड दिए।

नगरपालिकाले यस्ता समीक्षा तथा अन्तरक्रिया कार्यक्रमलाई नियमित बनाउँदै आयोजनाको प्रगति निरन्तर मूल्याङ्कन गर्ने र समयमै सम्पन्न गर्न आवश्यक सहकार्यलाई थप प्रभावकारी बनाउने जनाएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै