चितवन । पृथ्वी राजमार्गअन्तर्गत नागढुङ्गा–मुग्लिन सडक खण्डको तेस्रो प्याकेज मलेखु–मुग्लिन सडक स्तरोन्नतिको काम सम्झौताको तीन वर्ष छ महिना बितिसक्दा पनि ४६ प्रतिशत मात्र पूरा भएको छ। निर्धारित समयसीमाभित्र काम सम्पन्न गर्ने लक्ष्य राखिए पनि विभिन्न प्राविधिक तथा व्यवस्थापकीय समस्याका कारण निर्माण कार्य अपेक्षाकृत सुस्त देखिएको हो।

करिब ९५ किलोमिटर लामो नागढुङ्गा–मुग्लिन सडकलाई स्तरोन्नतिका लागि तीन प्याकेजमा विभाजन गरिएको छ। पहिलो प्याकेजमा नागढुङ्गा–नौबिसे, दोस्रोमा नौबिसे–मलेखु र तेस्रोमा मलेखु–मुग्लिन खण्ड राखिएको छ। तेस्रो प्याकेजअन्तर्गतको सडक ३८ दशमलव ८६ किलोमिटर लामो रहेको छ।

विसं २०७९ पुस १५ गते तीन वर्षभित्र निर्माण सम्पन्न गर्ने गरी सम्झौता भएको उक्त खण्डमा हालसम्म करिब १८ किलोमिटर सडक कालोपत्रे भएको छ। आयोजनाका सूचना अधिकारी सचेन्द्र मिश्रका अनुसार कालोपत्रेसहित समग्र भौतिक प्रगति ४६ प्रतिशत पुगेको छ। बर्खाको मौसमका कारण अहिले निर्माणको गति केही सुस्त रहेको र वर्षा कम भएपछि कामलाई पुनः तीव्रता दिइने उहाँले बताउनुभयो।

तेस्रो प्याकेजअन्तर्गत सडक क्षेत्रमा रहेका छवटा पुलमध्ये चारवटाको निर्माण अन्तिम चरणमा पुगेको छ। बाँकी दुई पुलको स्ट्रक्चर निर्माण भइरहेको आयोजनाले जनाएको छ। सडक निर्माणका क्रममा घर, रुख तथा विद्युत् पोल स्थानान्तरण गर्नुपर्ने अवस्था आउनुका साथै नक्साङ्कनमा समेत परिवर्तन गर्नुपरेकाले काममा ढिलाइ भएको मिश्रले बताउनुभयो।

निर्माणस्थलमा रहेका विद्युत् पोल अझै पूर्ण रूपमा स्थानान्तरण हुन सकेका छैनन्। त्यस्तै, आवश्यक निर्माण सामग्री समयमा उपलब्ध नहुँदा पनि निर्माण कार्य प्रभावित भएको आयोजनाको भनाइ छ। पछिल्लो समय सडक कालोपत्रेका लागि आवश्यक बिटुमिनको अभावले समेत काममा थप ढिलाइ भएको बताइएको छ।

सूचना अधिकारी मिश्रका अनुसार विभिन्न कारणका बाबजुद निर्माण कम्पनीले कालोपत्रेका लागि आवश्यक दुईवटा अस्फाल्ट प्लान्ट सञ्चालनमा ल्याउन नसक्दा अपेक्षित गतिमा काम अघि बढ्न सकेको छैन। अब वर्षायाम सकिएपछि निर्माण कार्यलाई तीव्र बनाउने तयारी गरिएको उहाँले जानकारी दिनुभयो।

कूल चार अर्ब ८० करोड ५९ लाख रुपैयाँ लागतमा निर्माण भइरहेको उक्त सडकको जिम्मेवारी शर्मा–जेडआइसिजीले पाएको हो। निर्माण कम्पनीले विसं २०८२ पुस १५ गतेभित्र काम सम्पन्न गर्ने प्रतिबद्धता जनाएको थियो। विश्व बैंकको सहुलियतपूर्ण ऋणमा सञ्चालन भइरहेको यो आयोजना राजधानी प्रवेश गर्ने र बाहिरिने सवारीसाधनका लागि महत्वपूर्ण मानिन्छ।

हाल उक्त सडक हुँदै दैनिक करिब १५ हजार सवारीसाधन आवतजावत गर्ने अनुमान गरिएको छ। सडक स्तरोन्नति पूरा भएपछि साँघुरो सडक, अवरोध र यातायात चापका कारण यात्रुले भोग्दै आएको समस्या कम हुने अपेक्षा गरिएको छ। आयोजना सम्पन्न भएपछि राजधानी र देशका विभिन्न भागबीचको आवागमन थप सहज, सुरक्षित र व्यवस्थित हुने विश्वास गरिएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै