चितवन । चितवनको राप्ती नगरपालिकाको एक बस्तीमा पसेर स्थानीयवासीमा त्रास फैलाएको बाघलाई चितवन राष्ट्रिय निकुञ्जको टोलीले नियन्त्रणमा लिएको छ। राप्ती नगरपालिका–१ स्थित बस्तीमा प्रवेश गरेको बाघलाई निकुञ्जको प्राविधिक टोलीले हात्तीको सहयोगमा ‘डार्ट’ गरी बेहोस बनाएर नियन्त्रणमा लिएको हो।

आइतबार बिहान करिब साढे ६ बजे अचानक बस्तीमा बाघ देखिएपछि स्थानीयवासी त्रसित भएका थिए। बाघले आक्रमण गर्दा स्थानीय ६० वर्षीय ठाकुर अधिकारी घाइते भएका छन्। उनको हाल भरतपुरस्थित सरकारी अस्पतालमा उपचार भइरहेको छ। चिकित्सकका अनुसार उनको अवस्था सामान्य रहेको जनाइएको छ।

त्यस्तै, बाघको आक्रमणबाट स्थानीय दिला कुमारी तामाङको एउटा गाईसमेत सामान्य घाइते भएको छ। बस्तीमा बाघ प्रवेश गरेपछि स्थानीयवासीले तत्काल स्थानीय प्रशासन र चितवन राष्ट्रिय निकुञ्जलाई खबर गरेका थिए।

सूचना प्राप्त भएलगत्तै निकुञ्जबाट हात्ती तथा प्राविधिक टोली घटनास्थलमा परिचालन गरिएको थियो। बाघलाई नियन्त्रणमा लिन टोलीले लामो समयसम्म सावधानीपूर्वक प्रयास गरेको थियो। करिब चार घण्टाको प्रयासपछि बिहान साढे १० बजे बाघलाई डार्ट गरी बेहोस बनाएर नियन्त्रणमा लिन सफल भएको निकुञ्ज प्रशासनले जनाएको छ।

बाघ नियन्त्रणमा लिनुअघि बस्ती तथा आसपासका क्षेत्रमा स्थानीयवासीलाई सचेत गराउँदै सुरक्षित स्थानमा रहन आग्रह गरिएको थियो। बाघ नियन्त्रणमा लिएपछि सम्भावित जोखिम टरेको भन्दै स्थानीयवासीले राहत महसुस गरेका छन्।

पछिल्लो समय वन क्षेत्रबाट बाघलगायत वन्यजन्तु मानव बस्तीमा प्रवेश गर्ने घटनाले स्थानीयवासीमा त्रास बढ्दै गएको छ। बस्ती नजिकै बाघ देखिएपछि सम्भावित मानवीय तथा पशुधन क्षति रोक्न निकुञ्ज प्रशासनले तत्काल उद्धार तथा नियन्त्रणको काम अघि बढाएको हो।

नियन्त्रणमा लिइएको बाघलाई आवश्यक स्वास्थ्य परीक्षण तथा निगरानीपछि चितवन राष्ट्रिय निकुञ्जको सुरक्षित क्षेत्रमा लैजाने तयारी भइरहेको निकुञ्ज प्रशासनले जनाएको छ। घटनापछि बस्ती आसपासको क्षेत्रमा थप सतर्कता अपनाउन स्थानीयवासीलाई आग्रह गरिएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै