मकवानपुर । मकवानपुरको कैलाश गाउँपालिकामा आयोजित निःशुल्क स्वास्थ्य शिविरबाट ३८३ जना स्थानीयवासी लाभान्वित भएका छन्। गाउँपालिकाको आयोजनामा शनिबार कैलाशस्थित वी.पी. स्मृति कैलाश आधारभूत अस्पतालमा एकदिने स्वास्थ्य शिविर सञ्चालन गरिएको हो।

शिविरमा स्थानीयवासीको स्वास्थ्य परीक्षण गर्नुका साथै आवश्यक चिकित्सकीय परामर्श तथा उपचार सेवा प्रदान गरिएको थियो। गाउँपालिकाका विभिन्न वडाबाट आएका नागरिकले शिविरमा सहभागी भएर स्वास्थ्यसम्बन्धी समस्या जाँच गराएका थिए। ग्रामीण तथा दुर्गम क्षेत्रका नागरिकलाई सहज रूपमा स्वास्थ्य सेवा उपलब्ध गराउने उद्देश्यले शिविर आयोजना गरिएको गाउँपालिकाले जनाएको छ।

शिविरमा सीएमसी हेटौंडा अस्पतालले प्राविधिक सहयोग गरेको थियो। अस्पतालबाट खटिएका स्वास्थ्यकर्मी तथा प्राविधिक टोलीले सेवाग्राहीको स्वास्थ्य परीक्षण, चिकित्सकीय परामर्श र आवश्यक उपचारमा सहजीकरण गरेका थिए।

स्वास्थ्य सेवा लिन टाढा जानुपर्ने बाध्यता रहेका स्थानीय नागरिकका लागि शिविर उपयोगी बनेको आयोजकको भनाइ छ। शिविरमा उल्लेख्य संख्यामा स्थानीयवासीको सहभागिता रहेकाले ग्रामीण क्षेत्रमा यस्ता स्वास्थ्य शिविरको आवश्यकता अझै रहेको देखिएको छ।

गाउँपालिकाले आगामी दिनमा पनि स्थानीय नागरिकलाई लक्षित गर्दै आवश्यकताअनुसार स्वास्थ्यसम्बन्धी कार्यक्रम सञ्चालन गर्ने जनाएको छ। नियमित स्वास्थ्य परीक्षण तथा समयमै उपचार पाउने अवसरबाट नागरिकको स्वास्थ्य अवस्थामा सुधार ल्याउन यस्ता कार्यक्रमले महत्वपूर्ण भूमिका खेल्ने अपेक्षा गरिएको छ।

चितवनमा एचआइभी सङ्क्रमण बढ्दो, नौ महिनामा ८० जनामा पुष्टि

इच्छाकामना आधारभूत अस्पताल भवनको उद्घाटन

भरतपुर अस्पतालमा पनि स्वर उपचार सेवा