चितवन । पश्चिम चितवनका बासिन्दालाई सामान्य स्वास्थ्य समस्या तथा स्वास्थ्य बीमासम्बन्धी उपचारका लागि भरतपुर अस्पताल धाउनुपर्ने बाध्यता अन्त्य गर्ने उद्देश्यले भरतपुर महानगरपालिका र भरतपुर अस्पतालबीच विशेषज्ञ स्वास्थ्य सेवा विस्तार गर्ने सम्झौता भएको छ। महानगरपालिका–१९ स्थित शारदानगर स्वास्थ्य चौकीमा क्रमशः विशेषज्ञ स्वास्थ्य सेवा सञ्चालन गर्ने सम्बन्धमा सोमबार सम्झौता–पत्रमा हस्ताक्षर गरिएको हो।

महानगरपालिकाका कार्यवाहक नगरप्रमुख चित्रसेन अधिकारीका अनुसार शारदानगर स्वास्थ्य चौकीको स्वामित्वमा रहेको २ बिघा ७ कठ्ठा जग्गामध्ये १४ कठ्ठा स्वास्थ्य चौकी र वडा कार्यालयका लागि सुरक्षित राखिनेछ। बाँकी जग्गा प्रचलित कानुन तथा मापदण्ड पूरा गरी आवश्यक नापी प्रक्रिया अघि बढाएर भोगचलनमा दिने सहमति भएको छ।

महानगरपालिकाले स्वास्थ्य केन्द्रको प्रारम्भिक पूर्वाधार निर्माण तथा उपकरण खरिदका लागि करिब १ करोड रुपैयाँ बजेट छुट्याएको छ। उक्त बजेटबाट एक्स–रे र इन्डोस्कोपी मेसिन खरिद गर्नुका साथै भवन नवीकरण, जाँच कक्ष र प्रशासनिक काउन्टर व्यवस्थापन गरिने अधिकारीले बताए।

“यो एक हिसाबले नेपालकै पहिलो स्याटेलाइट शैलीको स्वास्थ्य केन्द्र हो,” अधिकारीले भरतपुर अस्पतालका मेडिकल सुपरिटेण्डेन्ट (मेसु) डा. विश्वबन्धु बगालेको भनाइ उद्धृत गर्दै भने।

शारदानगरबाट बालबालिका तथा महिलासम्बन्धी उपचार, हाडजोर्नी परीक्षण, स्वास्थ्य बीमा, प्रयोगशाला र फार्मेसीलगायत सेवा उपलब्ध गराउने योजना छ। शल्यक्रिया वा भर्ना आवश्यक पर्ने बिरामीलाई अन्यत्र पठाउनुको सट्टा भरतपुर अस्पतालमै थप उपचारका लागि ल्याइने व्यवस्था गरिनेछ।

भरतपुर अस्पतालबाट करिब १६ किलोमिटर पश्चिममा रहेको शारदानगर भौगोलिक रूपमा पनि रणनीतिक स्थान मानिएको छ। माडी नगरपालिकाका बासिन्दाले समेत भरतपुर नआई नजिकैबाट स्वास्थ्य सेवा लिन सक्ने भएकाले यसबाट पश्चिम चितवनसँगै माडी क्षेत्रका नागरिकसमेत लाभान्वित हुने अपेक्षा गरिएको छ।

डा. बगालेका अनुसार सुरुवाती चरणमा विशेषज्ञसहित ओपीडी, प्रयोगशाला र फार्मेसी सेवा सञ्चालन गरिनेछ। “भरतपुर अस्पतालमा हामीले जुन सेवा दिन्छौं, त्यही सेवा उहाँहरूले त्यहीँ पाउनुहुनेछ,” उनले भने।

आवश्यकता र सञ्चालन क्षमताका आधारमा सेवा विस्तार गर्दै आकस्मिक, इन्डोर तथा शल्यक्रिया सेवासमेत सञ्चालन गर्ने योजना छ। दीर्घकालमा शारदानगर स्वास्थ्य केन्द्रलाई ठूलो अस्पतालका रूपमा विकास गर्ने लक्ष्य रहेको बगालेले बताए।

सेवा सञ्चालनअघि सरसफाइ, पहुँचमार्ग, प्रतीक्षालय, सेड तथा वेटिङ एरियालगायत न्यूनतम भौतिक पूर्वाधार तयार गर्ने जिम्मेवारी महानगरपालिकाले लिएको छ। पूर्वाधार निर्माण सम्पन्न भएपछि भरतपुर अस्पतालले आवश्यक विशेषज्ञ जनशक्ति व्यवस्थापन गरी सेवा सञ्चालन गर्नेछ। त्यसपछि केन्द्रको सञ्चालनगत जिम्मेवारी पूर्ण रूपमा भरतपुर अस्पतालले सम्हाल्नेछ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै