चितवन । नेपाली कांग्रेसको १५औँ केन्द्रीय महाधिवेशन तयारी समितिले चितवनका दीपक अधिकारीलाई जिल्ला सह–संयोजकमा मनोनीत गरेको छ। समितिका तर्फबाट प्रा. डा. शशांक कोइरालाले अधिकारीलाई पठाएको पत्रमा जिल्लाको संगठन सुदृढीकरणसँगै महाधिवेशन तयारीका गतिविधिलाई प्रभावकारी बनाउन सक्रिय भूमिका निर्वाह गर्ने अपेक्षा गरिएको उल्लेख छ।

समितिका अनुसार जिल्लाका नेताहरूको राय–सुझाव तथा केन्द्रीय प्रतिनिधिको सिफारिसका आधारमा अधिकारीलाई उक्त जिम्मेवारी दिइएको हो। महाधिवेशनको तयारीका क्रममा जिल्लास्तरमा आवश्यक समन्वय, संगठन परिचालन तथा अधिवेशनसम्बन्धी गतिविधिमा सहजीकरण गर्ने जिम्मेवारी अधिकारीको रहनेछ।

समितिले मुलुकको पछिल्लो राजनीतिक अवस्थालाई जटिल र अस्थिर रहेको उल्लेख गर्दै पार्टीभित्रको आधिकारिकतासम्बन्धी विवाद सर्वोच्च अदालतमा विचाराधीन रहेको जनाएको छ। पत्रमा नेपाली कांग्रेसको आधिकारिक केन्द्रीय कार्यसमितिले १५औँ महाधिवेशन सम्पन्न गर्ने वैधानिक दायित्व रहेको समितिको धारणा पनि उल्लेख गरिएको छ।

तयारी समितिको भदौ १७ र १८ गते बसेको बैठकले १५औँ महाधिवेशन काठमाडौंमा मंसिर २१, २२ र २३ गते गर्ने कार्यतालिका तय गरेको छ। निर्धारित कार्यतालिकाअनुसार असोज १५ गते वडा अधिवेशन, असोज २० गते पालिका अधिवेशन र असोज २३ गते प्रदेशसभा तथा प्रतिनिधिसभा निर्वाचन क्षेत्रीय अधिवेशन गर्ने तयारी छ।

त्यसैगरी कात्तिक १५ गते जिल्ला अधिवेशन तथा मंसिर ४ गते प्रदेश अधिवेशन गर्ने कार्यक्रम तय गरिएको छ। समितिले पार्टीभित्र देखिएका मतभेदलाई संयमता, धैर्यता र आपसी सहकार्यका माध्यमबाट व्यवस्थापन गर्दै संगठनलाई थप सुदृढ बनाउने प्रतिबद्धता जनाएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै