जाजरकोट । नेपाली कांग्रेस जाजरकोटको सभापतिमा बेदराज सिंह सर्वसम्मत निर्वाचित भएका छन् । जिल्ला निर्वाचन समितिले सार्वजनिक गरेको निर्वाचन कार्यतालिका अनुसारको प्रक्रिया पुरा गरेर सिंह सभापति पदमा सर्वसम्मत निर्वाचित भएका हुन् ।
१४औं जिल्ला अधिवेशनको निर्वाचनका लागि जिल्ला निर्वाचन समितिले शनिबार निर्वाचन कार्यतालिका सार्वजनिक गरेको थियो । निवर्तमान पार्टी सभापति दीपक जंग शाह अध्यक्ष रहेको नेपाली कांग्रेस जाजरकोटको कार्यदलले सहमति, सर्वस्वीकार्य तथा सहकार्यको माध्यमबाट नेपाली कांग्रेस, जाजरकोटलाई एकताबद्ध बनाउन आइतबार दिनभर प्रयास गरेको थियो ।
कार्यदलको विशेष अभ्यास पश्चात् नेपाली कांग्रेस जाजरकोट पार्टी सभापति सिंहलगायत सिङ्गो कार्यसमिति, प्रदेश क्षेत्र (क) र (ख) का क्षेत्रीय समितिका सभापति लगायत महाधिवेशन प्रतिनिधि र महासमिति सदस्य निर्विरोध निर्वाचित भएका छन् ।
नेपाली कांग्रेस, जाजरकोटले दिएको जानकारी अनुसार सभापतिमा सिंह, उपसभापतिमा रत्न खड्का र खडक बिसी निर्विरोध निर्वाचित भएका छन् । त्यसैगरी सचिवमा तेजविक्रम शाह र हरिचन्द्र बस्नेत, सहसचिवमा छवि पन्त र खडक बिसी निर्विरोध निर्वाचित भएका हुन् ।
कोषाध्यक्षका लागि भने निर्वाचित जिल्ला कार्यसमिति सदस्यबाट सभापतिले मनोनीत गर्ने प्रावधान भएको हुँदा अहिले नै आधिकारिक रूपमा टुङ्गो लागि नसकेको नेपाली कांग्रेस जाजरकोटले जानकारी दिएको छ । कोषाध्यक्ष पदको आकांक्षीमा पत्रकार भीम बहादुर सिंह, जनक केसीलगायत रहेका छन् ।
नेपाली कांग्रेसको विधान–२०१७ (संशोधन सहित) ले गरेको व्यवस्था अनुसार नगरपालिकाबाट दुई जना र गाउँपालिकाबाट एक जना जिल्ला कार्यसमितिमा प्रत्यक्ष निर्वाचित गरिने प्रावधान अनुसार नै जिल्ला कार्यसमितिलाई निर्विरोध निर्वाचित गरिएको छ । पार्टी विधान अनुसार सभापतिले मनोनीत गर्ने सदस्यसहित २७ सदस्यीय जिल्ला कार्यसमिति चयन हुने छ ।
प्रदेश क्षेत्र (क) को क्षेत्रीय सभापतिमा लीलाबहादुर शाह निर्वाचित भएका छन् । प्रदेश क्षेत्र (ख) को क्षेत्रीय सभापतिमा जनकराज शर्मा निर्वाचित भएका छन् । दुई वटै प्रदेश क्षेत्रका क्षेत्रीय समिति पनि २७ सदस्य रहने व्यवस्था भएको नेपाली कांग्रेस जाजरकोटले जानकारी दिएको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.