अस्पतालका मेडिकल सुपरिटेण्डेण्ट प्रा.डा. कृष्णप्रसाद पौडेलले बीमा शाखा मार्फत् गरिएका मिहिनेत र प्रयासका कारण अस्पतालको स्वास्थ्य बीमा कार्यक्रम उत्कृष्ट बन्न सफल भएको बताउनुभयो । उहाँले भन्नुभयो “साउन लागेपछि मात्रै सबैभन्दा बढी रकम भरतपुर अस्पतालले पाउनुमा यहाँका सेवाप्रदायक चिकित्सक, नर्स र कर्मचारीहरुको भूमिका महत्वपूर्ण छ ।” यसरी लाग्नेहरुलाई संस्थागत रुपमा अस्पतालले सधैं सम्मान गर्ने भन्दै उहाँले अस्पतालमा ओएनएम सर्वे अनुरुपको जनशक्ति प्राप्त भएसँगै कुनै समस्या नरहने गरी गुणस्तरीय सेवा दिन सकिने बताउनुभयो ।

६ सय शैयाको अस्पतालमा नेपाल सरकारका १७५ कर्मचारी रहेका छन् । बाँकी अस्पताल विकास समितिले धान्दै आएको छ । ओएनएम सर्वे अनुसार एक हजार ८५ कर्मचारी नेपाल सरकारका हुनु पर्दछ ।

अस्पताल विकास समितिका अध्यक्ष डा.भोजराज अधिकारी सेवाग्राहीहरुलाई सोचे जस्तो सेवा अझै दिन नसकिएको भन्दै उहाँले क्रमशः सेवामा गुणस्तरीय बृद्धि गरिंदै लगिने बताउनुभयो । विगतको तुलनामा बिरामीले राम्रो सेवा पाउँदै गएको भन्दै उहाँले जनशक्तिका कारण अस्पतालले चाहे जति गर्न नसकेको बताउनुभयो । बीमा कार्यक्रम अस्पताल सञ्चालनको मुख्य मेरुदण्ड भएको भन्दै उहाँले थप व्यवस्थित बनाउनु पर्ने बताउनुभयो ।

स्वास्थ्य बीमा बोर्डका कार्यकारी निर्देशक डा. दामोदर बसौलाले भरतपुर अस्पतालको बीमा कार्यक्रम राम्रो रहेको बताउनुभयो । अस्पतालले बीमा दावी गर्दा आवश्यक कागजात पु¥याएर गरेकाले दावी गरिएका अधिकांश फाईलहरु सदर हुँदा धेरै रकम लिन सफल भएको उहाँले बताउनुभयो । पछिल्ला वर्षहरुमा अस्पतालको गुणस्तरमा सुधारसँगै बढेका बीमाका बिरामीले राम्रो सेवा पाएको बसौला बताउनुहुन्छ । बोर्डले स्थापना भएपछि हालसम्म रु.२४ अर्ब निकासा गरेकोमा सरकारी सेवा प्रदायक सबैभन्दा धेरै रकम भरतपुर अस्पताल गएको उहाँले जानकारी दिनुभयो ।

बोर्डले साउनमा ४५० अस्पताललाई रु.२ अर्ब ६७ करोड भुक्तानी गर्दा भरतपुर अस्पताललाई रु.१३ करोड बढी पठाएको छ । बोर्डले सेवालाई व्यवस्थित गर्दै असारसम्मको बाँकी रकम एक महिनाभित्रमा भुक्तानी गर्ने गरी काम गरिरहेको बसौला बताउनुहुन्छ । असारसम्म अस्पतालहरुले भुक्तानी पाउनु पर्ने रकम रु.२ अर्ब ५० करोड हाराहारी छ । स्वास्थ्य बीमा कार्यक्रममा ६० लाख सदस्य बनिसकेका छन् ।