चितवन । कालिका नगरपालिका ७ चितवनमा रहेको उदयपुर सामुदायिक वन उपभोक्ता समूहले पर्यटक भित्राउन पार्कलाई व्यवस्थित बनाउँदै नयाँ आयामहरु थप्ने भएको छ । अध्यक्ष शंकर लामाका अनुसार आफूहरु नयाँ समितिमा निर्वाचित भएसँगै सामुदायिक वनको आम्दानी बढाउँदै अहिलेको पार्कवारे देशभर प्रचारप्रसार गराउन थप व्यवस्थित गराउन लागिएको हो ।

सामुदायिक वनभित्र १५ विघा जति क्षेत्रफलमा रहेको जमिनमा केशव लामा अध्यक्ष हुँदादेखि पिकनिक स्पोटको रुपमा अगाडि बढाइएको अध्यक्ष लामाको भनाई छ । अहिले सोही ठाउँमा भएको पिकनिक स्पोटलाई थप व्यवस्थित गराउँदै वाल उद्यान, नेपाली परम्परागत पिङ, गार्डेन लगायत निर्माण गर्दै थप व्यवस्थित गराउने योजना रहेको लामाले बताउनुभयो । सामुदायिक वनको आम्दानी,प्रदेश र केन्द्र सरकारबाट बजेट परेर हालसम्मका संरचना निर्माण भएको हो । अहिले सामुदायिक वन आफै ऋणमा रहेपनि बनिसकेको डिपिआर अनुसार थप योजना अगाडि बढाउने लामाको भनाई छ ।

डिपिआर नगरपालिकाले बनाइदिएको हो । अव सोही डिपिआर अनुसार काम गर्न नगरपालिका, प्रदेश र केन्द्रसरकारसँग बजेट माग गर्ने उहाँको भनाई छ । पार्कलाई थप रमणीय बनाउँदै वार्षिक कार्ययोजना बनाई काम गर्ने तयारी भइरहेको अध्यक्ष लामाले जानकारी दिनुभयो । पार्क भित्र एकातर्फ पिकनिक स्पोट, अर्कोतर्फ स्वीमिङ पुल, बालवालिका खेल्ने मेट्रो रेल,नेपाली परम्परागत पिङहरु काठको रटेँपिङ, झाँते पिङ लगायत निर्माण गर्नेगरी बजेट माग गर्ने तयारी भइरहेको उहाँले बताउनुभयो ।

साथै सोही पार्कमा सानो चिडियाखाना समेत बनाउने गरी पहल भइरहेको उहाँको भनाई छ । यसले गर्दा आन्तरिक पर्यटकको संख्या बढाउन मद्दत मिल्ने र त्यसको आम्दानीले समुदायमा रहेको गरिवी निवारणमा मद्दत तथा वन जोगाउन थप उर्जा मिल्ने समितिले विश्वास लिएको छ । जिल्ला वन सँग अनुमति लिएर चिडियाखानमा अजिङ्गर, मृग लगायतका वन्यजन्तु तथा चराचुरुङ्गीहरु राख्ने योजना रहेको उहाँको भनाई छ । पर्याप्त सम्भावना भएपनि यसको प्रचारप्रसार हुन नसकेको बताउँदै अध्यक्ष लामाले आफू अध्यक्षमा निर्वाचित भएको १० दिनमै भिडियो बनाएर व्यक्तिगत रुपमा प्रचारप्रसार थालेको बताउनुभयो ।

अव भने वनको आफ्नै वेवसाइट बनाउने योजना रहेको र त्यसबाट थप प्रचारप्रसार गर्ने योजनामा रहेको बताउनुभयो । पदमपुरको भाइरल घरबाट करिव १ किलोमिटर भित्र रहेको र झरनासमेत नजिक पर्ने भएकाले यसको सम्भावना देखेरै आफूहरु यसको विकास गर्न लागेको बताउनुभयो । सो पार्कको विकास गर्न नगरपालिकाले बनाएको डिपिआर अनुसार १० करोड बजेट आवश्यक पर्दछ ।

पर्याप्त बजेट नहुँदा अहिले भएका संरचनाको मर्मत सम्भार तथा सरसफाइमा केन्द्रीत हुनुपरेको बताउँदै अध्यक्ष लामाले सामुदायिक वनको विकासका लागि सवैले सहयोग गरिदिन आह्वान गर्नुभयो । अहिले पार्कमा प्रवेश गर्न पिकनिक स्टलको १ हजार रुपैया, प्रवेश शुल्क २० र चिल्ड्रेन पार्क प्रवेश ५० रुपैयाँ कायम गरिएको छ ।

विद्यार्थी तथा वालवालिकालाइ निःशुल्क प्रवेश र पार्कीङ निःशुल्क गरिएको अध्यक्ष लामाको भनाई छ । साना देखि ठूला गाडिहरु सजिलै पार्किङ गर्न सकिने अध्यक्ष लामाको भनाई छ ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै