☰

भर्खरै

लोकप्रिय समाचार

राम्रो संविधान बनाउँदा बहुमत ल्याउन सक्ने अवस्था भएन : सभापति देउवा

  •   सोमबार, पुष ०२, २०८० मा प्रकाशित
    • अ
    • अ
    • अ

    नुवाकोट । नेपाली कांग्रेसका सभापति शेरबहादुर देउवाले नेपालको संविधानअनुसार कुनै एक दलले बहुमत ल्याउन सक्ने अवस्था नभएका कारण एकभन्दा बढी दल मिलेर सरकार बनाउन बाध्य भएको बताउनुभएको छ । नेपाली कांग्रेस नुवाकोटको ‘प्रथम जिल्ला सम्मेलन’लाई आज विदुरमा सम्बोधन गर्दै सभापति देउवाले समावेशी र समानुपातिक निर्वाचन प्रणालीलाई सुनिश्चित गराई ‘राम्रो संविधान’ बनाएको कारण राजनीतिक दलले बहुमत ल्याउन सक्ने अवस्था नभएको बताउनुभयो ।

    “अहिलेको संविधानमा आदिवासी जनजाति, महिला तथा दलितलगायत पछिपरेका समुदायको प्रतिनिधित्व अनिवार्य गराई संविधान राम्रो बनायौँ । तर, कुनै एक दलले बहुमत ल्याउन सक्ने अवस्था यो निर्वाचन प्रणालीबाट सकिन्न,” उहाँले भन्नुभयो, “निर्वाचनमा ठूलो दल भए पनि बहुमत नभएको कारण एक अर्को दलसँग मिलेर सरकार सञ्चालनमा सहभागी भएका छाँै ।” कांग्रेस सभापति देउवाले आफ्नो पाटीभित्र घात अन्तरघात कायम रहेको भन्दै असन्तुष्टि जनाउनुभयो ।

    “कांग्रेसभित्र खुट्टा तानातानको प्रवृत्ति विगतदेखि अहिलेसम्म छ । घात गर्नेलाई कारबाही गरौँभन्दा दिँदैनन्,” उहाँले भन्नुभयो, “पार्टीलाई हराभर बनाएर ठूलोमात्र होइन, बहुमत प्राप्त दल बनाउन सबैको साथ हुनुपर्छ ।” पूर्वप्रधानमन्त्रीसमेत रहनुभएका कांग्रेस सभापति देउवाले कांग्रेस भित्रको गुटउपगुट हटाई पार्टी एकढिक्का भए अर्को चुनावमा बहुमत ल्याउन सक्ने विश्वास व्यक्त गर्नुभयो । कार्यक्रममा काङ्ग्रेसका वरिष्ठ नेता शेखर कोइरालाले पार्टी अहिले पनि बलियो अवस्थामा रहेको भन्दै आन्तरिक घात गर्नेबाट पार्टीलाई कमजोर बनाएको आरोप लगाउनुभयो ।

    “कांग्रेस अहिले पनि मजबुद छ । सङ्गठन चुस्त बनाएर लगे कसैले हराउन सक्दैन ।” वरिष्ठ नेता कोइरालाले भन्नुभयो, “आफ्नै छायासँग डर लाग्छ । आफ्नै साथीसँग सुरक्षित हुन चुनौती छ ।” उहाँले पार्टीलाई सुधार गरेर अघि बढाउनलाई पार्टी र पार्टीबाट प्रतिनिधित्व गरेका जनप्रतिनिधिबीच सहकार्य हुन आवश्यक रहेको सुझाव दिनुभयो । सम्मेलनमा केन्द्रीय सदस्य अर्जुननरसिंह केसीले पार्टी सञ्चालनमा व्यक्ति हाबी भएको आरोप लगाउनुभयो ।

    “पार्टीको जिम्मेवारीदेखि अर्को दलले नेतृत्व गरेको सरकारमा जान हुने कि नहुने, जाने हो भने कसलाई कुन जिम्मेवारीमा पठाउने भन्नेमा एक पक्षीय निर्णय भइरहेको छ,” केसीले भन्नुभयो, “सरकारमा सहभागी मन्त्रीहरुका काण्डहरुको समीक्षा हुनुपर्छ । पाटी सुधार्न सके देश सञ्चालनमा सुधार आउँछ ।” पार्टी प्रवक्ता डा प्रकाशशरण महतले सरकारले प्रभावकारी र जनअपेक्षाअनुसार काम गर्दै आइरहेको दाबी गर्नुभयो । “राज्यको सीमित स्रोत र साधनमा जनताको असीमित आवश्यकता पूरा गर्दै आइरहेका छौँ,” अर्थमन्त्रीसमेत रहनुभएका प्रवक्ता महतले भन्नुभयो, “सरकारको राम्रो कामको प्रचार गरौँ, अनावश्यक टिप्पणी गरेर जनतालाई भ्रमित बनाउन दल भित्रैबाट भइरहेको कदम बन्द गर्नुपर्छ ।”

    कांग्रेस केन्द्रीय सदस्य बहादुरसिंह लामाले कांग्रेसको सहभागितामा केन्द्रदेखि प्रदेशसम्मको सरकार सञ्चालनमा जनहितका कामहरु प्रशस्त भएको दाबी गर्नुभयो । कार्यक्रममा कांग्रेस बागमती प्रदेस सभापति इन्द्र बानियाँ, नुवाकोटका पूर्वसभापतिहरु जगदीश्वरनरसिंह केसी, धुव्रप्रसाद अधिकारी लगायतले निर्वाचनमा गठबन्धन, सरकारमा सहभागीलगायत विषयमा पार्टीको तल्लो तहबाट जनमत लिएर मात्रै निर्णय गर्नुपर्ने सुझाव दिनुभयो ।

    आजदेखि सुरु भएको कांग्रेस नुवाकोटको सम्मेलन बन्दसत्रमा पेस भएका जिल्लाको राजनीतिक तथा साङ्गठानिक विषयमा छलफल गर्दै सम्पन्न हुने जिल्ला सभापति रमेशकुमार महतले जानकारी दिनुभयो । राज्य पुनःसंरचनापश्चात् कांग्रेसले यो पहिलोपटक जिल्ला सम्मेलन गर्न लागेको हो ।

    लोकप्रिय

    भर्खरै