नवलपुरमा थुप्रै पर्यटकीय स्थान भए पनि त्यसलाई स्तरोन्नति गरी प्रचारमा ल्याउन नसकिएकोप्रति वक्ताहरुले ध्यानाकर्षण गराएका थिए । सङ्घीय सरकार, स्थानीय सरकार, राजनीतिक दल र पत्रकार सबैले समन्वयकारी भूमिका खेल्नसके नवलपरासीको पर्यटनलाई माथि उठाउन सकिने छलफलको निष्कर्ष थियो ।

चौथो चरणमा ‘प्रकृति, पर्यटन र साहित्य’ शीर्षकमा छलफल गरिएको छ । यो सत्रमा लेखक अमर न्यौपाने र ददी सापकोटासँग पत्रकार सूर्यप्रकाश कँडेलले छलफल गर्नुभएको थियो । लेखनका माध्यमबाट स्थान विशेषको चर्चा हुने र पाठकले त्यसलाई पछ्याउँदै आउने अमर न्यौपानेले बताउनुभयो । मदन पुरस्कार प्राप्त आफ्नो कृति ‘सेतो धरती’ पढेर स्वदेश र विदेशबाट पनि मानिस देवघाट आएको सन्दर्भ उहाँले सुनाउनुभयो ।

छलफलका क्रममा अर्का वक्ता ददी सापकोटाले प्रकृतिमा रहेर जीवजन्तु तथा चराचुरुङ्गीलाई संरक्षण गरेमात्रै पर्यटनलाई बचाउन सकिने बताउनुभयो । सापकोटाले जीवजन्तुको आनीबानी र महत्वकाबारेमा चर्चा गर्नुभएको थियो । घडियाल काव्य उत्सवको बाँकी छलफलमा काव्य वाचन, आँगनीमा लिट्–नेचर, सिने पर्यटन ः नवलपरासीदेखि नवलपुरसम्म तथा गोलमेच पालिका बहस ः लगाव र लगानी शीर्षकमा छलफल हुने बताइएको छ । सो उत्सव आज सम्पन्न हुने बताइएको छ ।