चितवन । भरतपुर महानगरपालिका वडा नम्बर २९ सिमलतालमा पहिरो सहित त्रिशुलीमा बस खस्दा पौडिएर बँचेका रौतहटका नन्दन दास १७ दिनको उपचारपछि आज डिस्चार्ज भएका छन् । चितवन मेडिकल कलेज (सिएमसी) शिक्षण अस्पतालमा उपचारपछि उहाँ डिस्चार्ज हुनु भएको हो । डिस्चार्ज हुनु अघि कुराकानी गर्दै दासले राम्रो उपचार पाएसँगै आफू पूर्ण रुपमा स्वस्थ बनेको बताउनुभयो । उहाँले हालसम्म आफूले एक रुपैयाँ पनि खर्च गर्न नपरेको भन्दै सम्पूर्ण उपचार अस्पतालले निःशुल्क गरिदिएको बताउनुभयो ।

अस्पतालका प्रमुख प्रशासक प्रताप देवकोटाका अनुसार दासको उपचारका लागि २ लाख २७ हजार ३४४ रुपैयाँ खर्च भएको छ । फार्मेसीको एक लाख १६ हजार १२४ रुपैयाँ र अस्पतालको एक लाख ११ हजार २२० रुपैयाँ खर्च भएको देवकोटाले बताउनुभयो । उहाँले दासको उपचारमा लागेको सम्पूर्ण उपचार खर्च निःशुल्क गरिएको जानकारी दिनुभयो । उहाँले भन्नुभयो “सिमलताल घटनाका दुई जना घाईतेको उपचार निःशुल्क गरेका छौं ।” यस अघि अर्काे घाईतेको पनि अस्पतालमा निःशुल्क उपचार गरिएको थियो ।

दासको भने चिउडोमा गम्भीर चोटका कारण दुई वटा शल्यक्रिया गर्नु परेको थियो । अस्पतालमा निकै राम्रो उपचार पाएको भन्दै दासले खुशी प्रकट गर्नुभयो । उहाँले भन्नुभयो “राम्रो उपचार पाएँ, उपचारका क्रममा कुनै समस्या भएन, अहिले एकदम ठीक छु ।” उहाँले आउँदा दिनमा यस्तो घटना कहिल्यै नहोस् भन्ने कामना समेत गर्नुभयो । उक्त घटनामा दुई वटा बसमा सवार ६५ जना मध्ये दास सहित तीन जना पौडिएर बाहिर निस्किएका थिए । हराएका दुईवटा बसहरु अझै फेला पर्न सकेका छैनन् । ६२ जना बेपत्ता भएका थिए ।

हालसम्म २४ जनाको शव भेटिएकोमा १८ जनाको पहिचान खुलेर परिवारलाई बुझाई सकिएको छ । अन्य ६ जनाको शब अझै पहिचान खुल्न सकेको छैन । अझै ३८ यात्रु र दुईवटै बसको अवस्था पत्ता लाग्न सकेको छैन । नेपाल सरकारले बस र यात्रुका खोजीका लागि बोलाएको चार जना भारतीय गोताखोर सहितको टोली परिचालन गर्दा समेत बसको अवस्थाबारे जानकारी लिन नसकिएको प्रमुख जिल्ला अधिकारी इन्द्रदेव यादववले बताउनुभयो । साउन ५ गतेदेखि यहाँ आएर खोजी कार्यमा लागेको भारत सरकारको नेसनल डिजास्टर रेस्पोन्स फोर्स (एनडिआरएफ) को १२ सदस्यीय टोलीले सात दिनसम्म नदीमा खोजी कार्य गरी आजबाट फर्किएको छ ।

भारतीय गोताखोर सहितको टोलीले घटनास्थल सिमलतालदेखि गाईघाटसम्मको ३ दशमलब ५ किलोमिटर क्षेत्रफलमा बस हुन सक्ने अनुमान गरेको उहाँले बताउनुभयो । यादवले भन्नुभयो “बस नै हो भन्ने होईन । केही वस्तु छ भन्ने अनुमान उहाँहरुको छ । त्यही अनुसार खोजी कार्य जारी राख्छौ ।” भारतीय टोली फर्किए पनि नेपालको टोलीले खोजी जारी राख्ने उहाँले जानकारी दिनुभयो ।

नदीको गहिराई, पानीको बहाब अनुसारको उपकरण अभावका कारण खोजीमा कठिन भएको उहाँले बताउनुभयो । गत असार २८ गते शुक्रबार वीरगञ्जबाट काठमाडौँ जाँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौँबाट गौर जान आउँदै गरेको बागमती प्रदेश ०३–२४९५ ख ००१ नम्बरको गणपति डिलक्स बस चितवनको सिमलतालमा खसेको पहिरोसँगै बगेर त्रिशूली नदीमा यात्रु सहित बेपत्ता भएका थिए । कान्तिपुर हेल्थबाट

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै