रौतहट लगायत देशका विभिन्न जिल्लाबाट युवायुवतीहरुलाई राम्रो कमाई र सेवा सुविधा हुने प्रलोभन देखाएर ल्याउने गरिएको पिडितले बताएका छन् । उनीहरुका अनुसार राम्रो कमाई हुन्छ । हप्ता–हप्तामा तलब आउँछ । खान बस्नको व्यवस्था छ । मोटरसाइकल र स्कुटर पनि कम्पनीले नै दिन्छ भनि प्रलोभन देखाएर ल्याइएको थियो । यहाँ ल्याइसकेपछि फुड सप्लिमेन्टहरु किन्न लगाइयो ।

आफुले किनेको फुड सप्लिमेन्ट जति धेरै बेच्न सक्यो त्यति धेरै स्टारहरु प्राप्त गर्न सकिने र नौ वटासम्म स्टार पाउनेले राम्रो कमाई गर्न सकिने आश्वासन दिइएको थियो । तलब दिनुको साटो लाखौँ लाखको फुड सप्लिमेन्टहरु किन्न लगाइएको पीडितको गुनासो छ । आफु ठगिएको थाहा पाएपछि कतिपय युवायुवतीहरु पैसाको आश मारेर घर फर्किएको पनि पाइएको छ ।

नेटवर्किङ विजनेशको नाममा ठगी गर्नेहरु समातिएपछि धेरै पिडितहरु हाम्रो सम्पर्कमा आएका छन् । एक जनाबाट सात लाख रुपैयाँसम्म ठगी गरिएको पीडितहरु बताउँछन् । भरतपुरको हाकिमचोक र बसपार्क क्षेत्रमा पनि ठगीको गतिविधिहरु भइरहेको उनीहरुले सूचना दिएका छन् ।