काठमाडौँ । कम्बोडियामा विभिन्न प्रलोभनमा परी पुगेका तीन नेपाली नागरिकको उद्धार गरिएको छ । उनीहरूलाई अवैध रूपमा सञ्चालित अनलाइन ठगी केन्द्र र क्यासिनोमा गैरकानुनी काममा लगाइएको थियो।
थाइल्याण्डस्थित नेपाली राजदूतावासको पहल तथा कम्बोडिया सरकारको सहयोगमा उनीहरूको उद्धार गरिएको हो । गैरआवासीय नेपाली संघ कम्बोडियाको सहजीकरणमा उनीहरू चैत १९ गते कम्बोडियाबाट उडेर चैत २० गते त्रिभुवन अन्तर्राष्ट्रिय विमानस्थलमा अवतरण गर्ने गरी स्वदेश फर्काइएका छन् ।
राजदूतावासका अनुसार कम्बोडियामा अझै केही नेपालीहरू अलपत्र परेका वा कठिन अवस्थामा रहेको जानकारी प्राप्त भएको छ । त्यस्ता नागरिकलाई स्वदेश फर्काउन आवश्यक पहल भइरहेको जनाइएको छ । कम्बोडियामा नेपालीहरूलाई अनलाइन ठगी लगायत गैरकानुनी काममा लगाइएको तथा भिसा बिना वा भिसा अवधि सकिएपछि समेत बसिरहेको अवस्था देखिएको छ । यस्तो अवस्थामा रहेका नेपालीलाई तत्काल राजदूतावास वा गैरआवासीय नेपाली संघका प्रतिनिधिसँग सम्पर्क गर्न आग्रह गरिएको छ ।
स्क्यामिङ केन्द्रमा काम गराइएका धेरैको राहदानी कम्पनीले जफत गर्ने वा स्थानान्तरणका क्रममा हराउने गुनासो आएको छ । यस्तो अवस्थामा स्वदेश फर्कन नेपाली राजदूतावासले निःशुल्क एकतर्फी यात्रा अनुमति पत्र उपलब्ध गराउँदै आएको छ । तथ्यांक अनुसार पछिल्ला वर्षहरूमा कम्बोडिया जाने नेपालीको संख्या तीव्र रूपमा बढेको छ। सन् २०२१ मा १०१ जना पुगेका नेपाली सन् २०२५ सम्म आइपुग्दा ९ हजार ६७६ पुगेका छन् ।
नेपाल सरकारले तोकेको प्रक्रिया अनुसार श्रम स्वीकृति लिएर मात्र वैदेशिक रोजगारीमा जान तथा छिटो कमाइ हुने प्रलोभनमा परी भ्रमणको बहानामा कम्बोडिया, लाओस, म्यानमार, थाइल्याण्ड लगायतका देश नजान राजदूतावासले पुनः आग्रह गरेको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.