काठमाडौँ । राष्ट्रिय सभा अध्यक्ष नारायणप्रसाद दाहाल र टर्कीको संसदका सभामुख नुमान कुर्तुल्मुसबीच शिष्टाचार भेटवार्ता भएको छ ।
अन्तर व्यवस्थापिका सङ्घको १५२औँ महासभामा सहभागी हुन इस्तानबुल पुगेका अध्यक्ष दाहालले टर्कीका सभामुख कुर्तुल्मुससँग भेट गरेका हुन् । भेटमा दुई देशबीचको सम्बन्ध, आपसी हित तथा संसदीय सहकार्यका विषयमा छलफल भएको जनाइएको छ ।
अध्यक्ष दाहालले संसदीय सहकार्यमार्फत नेपाल र टर्कीबीचको सम्बन्ध अझ मजबुत बनाउनुपर्नेमा जोड दिँदै संसदीय अनुभव आदानप्रदान, भ्रमण तथा मैत्री समूह गठनमा रुचि रहेको बताए । उनले करिब ६ दशकदेखिको कूटनीतिक सम्बन्धलाई थप प्रगाढ बनाउन नेपालमै टर्कीको दूतावास स्थापना गर्न आग्रह गरे ।
टर्कीसँग सम्बन्धित कामका लागि नेपालीहरूलाई हाल दिल्ली जानुपर्ने अवस्थाको उल्लेख गर्दै उनले नेपाल र टर्कीबीच श्रम सम्झौता तथा नेपालमै दूतावास स्थापना भए सहकार्य अझ सहज हुने विश्वास व्यक्त गरेका थिए । उनले महासभामा टर्की सरकार र संसदले गरेको स्वागतप्रति धन्यवाद पनि व्यक्त गरे ।
सभामुख कुर्तुल्मुसले नेपाली प्रतिनिधिमण्डललाई इस्तानबुलमा स्वागत गर्न पाउँदा खुसी लागेको बताए । उनले दुई देशबीचको सम्बन्ध सुदृढ बनाउन टर्की प्रतिबद्ध रहेको उल्लेख गर्दै नेपालमा दूतावास खोल्ने विषयमा सकारात्मक रहेको जानकारी दिए ।
टर्की सरकारले नेपालका लागि उपलब्ध गराउँदै आएको शैक्षिक छात्रवृत्तिको कोटा बढाउने र द्विपक्षीय व्यापार विस्तार गर्ने प्रतिबद्धता पनि उनले व्यक्त गरे ।
आगामी नोभेम्बरमा टर्कीमा हुने जलवायु सम्बन्धी सम्मेलनका लागि सहयोग गर्न उनले नेपालसँग आग्रह गरे । जवाफमा अध्यक्ष दाहालले उक्त सम्मेलन सफलताको शुभकामना दिँदै नेपाल सकारात्मक रहेको बताए ।
भेटमा महासभामा सहभागी नेपाली संसदीय प्रतिनिधिमण्डलका सदस्यहरू पनि उपस्थित थिए ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.