चितवन । जनस्वास्थ्य कार्यालय चितवनले जिल्लाभर सञ्चालनमा रहेका एम्बुलेन्सहरूको अद्यावधिक प्रक्रिया अघि बढाएको छ । कार्यालयले गत वैशाख २६ गते सूचना जारी गर्दै सबै एम्बुलेन्सलाई सात दिनभित्र विवरण अद्यावधिक गर्न निर्देशन दिएको थियो । सो निर्देशनपछि जिल्लाका ९३ वटा दर्ता भएका एम्बुलेन्समध्ये ८६ वटाले मात्रै अद्यावधिक गराएका छन् । अद्यावधिक भएका सवारीमध्ये दुईवटा शववाहनसमेत रहेका छन् ।

कार्यालयका प्रमुख निर्मल घिमिरेका अनुसार अद्यावधिकका लागि आएका एम्बुलेन्समध्ये अधिकांश ख र ग वर्गका रहेका छन् । जिल्लामा हाल क वर्गका एम्बुलेन्स सञ्चालनमा नरहेको उहाँले जानकारी दिनुभयो । अद्यावधिक भएका एम्बुलेन्समध्ये १२ वटा ख वर्गका र ७४ वटा ग वर्गका रहेका छन् ।

एम्बुलेन्स सञ्चालन निर्देशिकाअनुसार क वर्गका एम्बुलेन्समा भेन्टिलेटरसहित मेडिकल अधिकृत, एचए वा स्टाफ नर्सको व्यवस्था अनिवार्य हुन्छ । यस्तै ख वर्गका एम्बुलेन्समा एचए वा स्टाफ नर्सको सेवा उपलब्ध हुनुपर्छ भने ग वर्गका एम्बुलेन्सले अक्सिजनसहित बिरामी ओसारपसार गर्ने आधारभूत सेवा मात्र प्रदान गर्छन् ।

अद्यावधिक गरिएका एम्बुलेन्समध्ये १७ वटा स्वास्थ्य संस्थाबाट सञ्चालित छन् भने १७ वटा नेपाल रेडक्रस सोसाइटी अन्तर्गत रहेका छन् । बाँकी ५२ वटा विभिन्न प्रतिष्ठान, ट्रस्ट तथा अन्य संस्थाबाट सञ्चालन हुँदै आएका छन् । जनस्वास्थ्य कार्यालयका अनुसार अद्यावधिक गर्न आएका एम्बुलेन्समध्ये २९ वटाले १० वर्ष सेवा अवधि पूरा गरिसकेका छन् । एम्बुलेन्स सञ्चालन निर्देशिका २०८२ अनुसार १० वर्षभन्दा पुराना एम्बुलेन्स नवीकरण गर्न नमिल्ने व्यवस्था रहेको प्रमुख घिमिरेले बताउनुभयो ।

जिल्ला एम्बुलेन्स व्यवस्थापन समितिको निर्णयअनुसार अद्यावधिक प्रक्रिया सञ्चालन गरिएको हो । समितिले जिल्लाका सबै एम्बुलेन्समा जिपिएस जडान गरी सञ्चालन गर्न निर्देशन दिएको छ । हाल अद्यावधिक भएका एम्बुलेन्समध्ये ४२ वटामा जिपिएस जडान गरिएको भए पनि प्रयोगमा नरहेको पाइएको छ । त्यस्तै ४४ वटा एम्बुलेन्समा अझै जिपिएस जडान गरिएको छैन ।

पालिकागत विवरणअनुसार भरतपुर महानगरपालिकामा सबैभन्दा धेरै ४३ वटा एम्बुलेन्स सञ्चालनमा रहेका छन् । त्यसपछि खैरहनी नगरपालिकामा १६ वटा, कालिका नगरपालिकामा १० वटा तथा राप्ती नगरपालिकामा ६ वटा एम्बुलेन्स रहेका छन् । रत्ननगर नगरपालिका र इच्छाकामना गाउँपालिकामा तीन–तीन वटा एम्बुलेन्स सञ्चालनमा छन् भने माडी नगरपालिकामा दुई वटा एम्बुलेन्स रहेका छन् । साथै अन्य जिल्लामा दर्ता भएर भरतपुर क्षेत्रमा सञ्चालनमा रहेका तीन वटा एम्बुलेन्स पनि रहेको कार्यालयले जनाएको छ ।

जनस्वास्थ्य कार्यालयले अद्यावधिक नगरी सञ्चालन भइरहेका एम्बुलेन्सलाई तत्काल विवरण अद्यावधिक गर्न आग्रह गरेको छ । कार्यालयका अनुसार अद्यावधिक नगरी सञ्चालन गरिएका एम्बुलेन्समाथि स्थानीय प्रशासनमार्फत कारबाही प्रक्रिया अघि बढाइनेछ ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै