चितवन  । ‘पर्यटकीय सहर, समुन्नत रत्ननगर’ भन्ने मूल नारालाई आत्मसात गर्दै रत्ननगर नगरपालिका वडा नम्बर १ ले आयोजना गरेको बृहत् निःशुल्क आँखा शिविर सफलतापूर्वक सम्पन्न भएको छ। रत्ननगर–१ बकुलहरस्थित आयुर्वेद तथा वैकल्पिक चिकित्सालय परिसरमा सञ्चालन गरिएको शिविरबाट ४६७ जना स्थानीय नागरिकले प्रत्यक्ष स्वास्थ्य सेवा प्राप्त गरेका छन्।

भरतपुर आँखा अस्पताल को प्राविधिक सहयोगमा आयोजित शिविरमा आँखाको पावर परीक्षण, रोग पहिचान, उपचार परामर्श तथा निःशुल्क औषधि वितरण गरिएको थियो। साथै मोतियाबिन्दु लगायत विभिन्न नेत्ररोगको पहिचान गरी आवश्यक बिरामीलाई थप उपचारका लागि सिफारिस गरिएको थियो।

कार्यक्रमलाई सम्बोधन गर्दै रत्ननगर नगरपालिकाको स्वास्थ्य शाखाका सह–संयोजक बासुदेव सापकोटा ले दृष्टि मानव जीवनको आधारभूत आवश्यकता भएकाले सबै नागरिकलाई सहज स्वास्थ्य सेवा उपलब्ध गराउन नगरपालिका निरन्तर सक्रिय रहेको बताए। उनले स्वास्थ्य क्षेत्रमा रत्ननगर नगरपालिकाले उत्कृष्ट सेवा प्रवाह गर्दै आएको उल्लेख गर्दै विपन्न नागरिकको उपचारका लागि विभिन्न अस्पतालसँग समन्वय गरी उपचार कोष सञ्चालन गरिएको जानकारी दिए।

शिविरमा वरिष्ठ नेत्र सहायक सुवास सापकोटा ले आवश्यक परेका बिरामीलाई निःशुल्क चश्मा उपलब्ध गराइने तथा मोतियाबिन्दु भएका बिरामीको निःशुल्क शल्यक्रिया गरिने बताए। परीक्षण गरिएका नागरिकमध्ये २२ जनामा मोतियाबिन्दुको समस्या देखिएको थियो। तीमध्ये १९ जनालाई थप उपचार तथा शल्यक्रियाका लागि सोही दिन भरतपुर आँखा अस्पताल पठाइएको अस्पतालले जनाएको छ। शल्यक्रिया, औषधि तथा चश्माको सम्पूर्ण व्यवस्था निःशुल्क गरिएको छ।

शिविरमा आँखा रातो हुने, चिलाउने, आँसु बगिरहने र मासु पलाउने जस्ता समस्याबाट पीडित बिरामीलाई आवश्यक परामर्शसहित औषधि वितरण गरिएको थियो। कार्यक्रममा सभाध्यक्ष तथा वडा अध्यक्ष कुलप्रसाद सापकोटा ले जनसहभागिताले आफूलाई उत्साहित बनाएको बताउँदै आगामी दिनमा प्रत्येक तीन महिनामा यस्ता शिविर सञ्चालन गर्ने प्रतिबद्धता व्यक्त गरे।

शिविरमा १०० जनालाई नजिकको दृष्टिका लागि निःशुल्क चश्मा वितरण गरिएको थियो। वडा कार्यालयको यस पहलले आर्थिक अभावका कारण उपचारबाट वञ्चित स्थानीय नागरिकलाई ठूलो राहत पुगेको सहभागीहरूले बताएका छन्। कार्यक्रममा जनप्रतिनिधि, कर्मचारी, सामाजिक अगुवा तथा महिला स्वास्थ्य स्वयंसेविकाको उल्लेखनीय सहभागिता रहेको थियो।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै