पूर्वी नवलपरासी । पूर्वी नवलपरासीको गैंडाकोट नगरपालिका–२ स्थित नारायणी नदीमा पुलबाट हाम फालेका एक ६२ वर्षीय पुरुषको सशस्त्र प्रहरी बल नेपालले सकुशल उद्धार गरेको छ।

प्राप्त विवरणअनुसार देवचुली नगरपालिका–११, धारापानी निवासी झनक प्रसाद पौडेलले बिहीबार बिहान करिब १०:१० बजे नारायणी नदीको पुलबाट नदीमा हाम फालेका थिए। घटनाबारे जानकारी प्राप्त हुनासाथ सशस्त्र प्रहरी बल नेपाल नम्बर ३१ गुल्म, पूर्वी नवलपरासीले तत्काल उद्धार अभियान सञ्चालन गरेको थियो।

सशस्त्र प्रहरी निरीक्षक रामचन्द्र खड्काको नेतृत्वमा ३० सदस्यीय उद्धार टोली घटनास्थलतर्फ परिचालन गरिएको थियो। उद्धार टोलीले तीव्र गतिमा खोज तथा उद्धार कार्य सञ्चालन गर्दै नदीमा हाम फालेको करिब १० मिनेटभित्रै पौडेललाई सुरक्षित रूपमा बाहिर निकाल्न सफल भएको सशस्त्र प्रहरीले जनाएको छ। प्रहरीका अनुसार पौडेललाई बिहान १०:२० बजे सकुशल उद्धार गरिएको हो।

उद्धारपछि प्रारम्भिक स्वास्थ्य परीक्षण गरी उनको अवस्था बुझिएको थियो। त्यसपछि थप उपचार तथा स्वास्थ्य निगरानीका लागि सशस्त्र प्रहरी बलको एमटीआर (मोबाइल ट्रमा रेस्पोन्स) मार्फत चितवन पठाइएको जनाइएको छ। हाल उनको स्वास्थ्य अवस्था सामान्य रहेको प्रारम्भिक जानकारी प्राप्त भएको छ।

घटनापछि स्थानीयवासी, सुरक्षा निकाय तथा सम्बन्धित निकायहरूले उद्धार टोलीको तदारुकता र प्रभावकारी कार्यको प्रशंसा गरेका छन्। नदी तथा पुल क्षेत्रमा हुने यस्ता आकस्मिक घटनामा समयमै सूचना प्रवाह र सुरक्षा निकायको सक्रियताले मानव जीवन बचाउन महत्वपूर्ण भूमिका खेल्ने गरेको उदाहरणका रूपमा यस घटनालाई हेरिएको छ।

सशस्त्र प्रहरी बलले विपद् तथा आपत्कालीन अवस्थामा नागरिकको सुरक्षा र उद्धारका लागि आफूहरू सधैं तयारी अवस्थामा रहेको जनाएको छ।

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै

उत्कृष्ट नतिजा दिलाउने अङ्कुरम् एकेडेमीका विषयगत शिक्षक सम्मानित