भट्टराईका अनुसार ह्याङ्गरले करिब ३० हजार वर्गफिट क्षेत्र ढाक्नेछ र भित्र १० देखि १२ हजारसम्म मानिस अट्न सक्ने अनुमान गरिएको छ। पोखरा लिटरेचर फेस्टिभल लगायत विभिन्न राष्ट्रिय तथा व्यावसायिक कार्यक्रमहरूमा यस्ता संरचना सफलतापूर्वक प्रयोग भइसकेका छन्।

‘जर्मन ह्याङ्गर’ प्रदर्शनी, सांस्कृतिक कार्यक्रम, उत्पादन सार्वजनिकरण, व्यापारिक मेला तथा विवाह समारोहजस्ता ठूला कार्यक्रमका लागि विश्वभर प्रयोग गरिने आधुनिक अस्थायी संरचना हो। यसको विशेषता भनेको छिटो जडान गर्न सकिनु, बलियो हुनु तथा विभिन्न मौसमीय अवस्थासँग सामना गर्न सक्नु हो।

चितवनमा हाल अत्यधिक गर्मी रहेको र मनसुन सुरु भइसकेको अवस्थामा खुला चौरमा ठूलो कार्यक्रम सञ्चालन गर्दा समस्या आउन सक्ने भएकाले आयोजकले यस्तो संरचना निर्माण गर्ने निर्णय गरेको जनाएको छ। यसले सहभागीलाई सहज वातावरण उपलब्ध गराउनुका साथै कार्यक्रमको व्यवस्थापनलाई पनि प्रभावकारी बनाउने अपेक्षा गरिएको छ।

रास्वपाको प्रथम राष्ट्रिय महाधिवेशन आगामी आइतबार उद्घाटन हुनेछ। महाधिवेशन तीन दिनसम्म चल्नेछ र मंगलबार सम्पन्न हुने कार्यक्रम तय गरिएको छ। पार्टीको भावी संगठनात्मक दिशा, नेतृत्व चयन तथा नीतिगत विषयहरूमा महत्त्वपूर्ण निर्णय हुने अपेक्षासहित महाधिवेशनको तयारी अन्तिम चरणमा पुगेको छ।