चितवन ।  चितवनसहित देशका विभिन्न क्षेत्रमा पछिल्ला दिनहरूमा तापक्रम बढ्दै गएको छ। बढ्दो गर्मीका कारण सर्वसाधारणको दैनिक जनजीवन प्रभावित हुन थालेको छ। विशेषगरी दिउँसोको समयमा अत्यधिक गर्मी महसुस हुँदा मानिसहरूलाई घरबाहिर निस्कन कठिनाइ भइरहेको छ।

भरतपुर विमानस्थल कार्यालयका अनुसार बिहीबार भरतपुरको अधिकतम तापक्रम ३६ डिग्री सेल्सियस मापन गरिएको छ। कार्यालयले उपलब्ध गराएको तथ्यांकअनुसार दिउँसोको समयमा तापक्रम ३६ डिग्री सेल्सियस पुगेको हो। गर्मी बढेसँगै बजार, सडक तथा सार्वजनिक स्थलहरूमा मानिसहरूको चहलपहल समेत तुलनात्मक रूपमा कम देखिन थालेको छ।

मौसमविद्हरूका अनुसार मनसुन सक्रिय हुनुअघि र बीच–बीचमा घाम लाग्ने क्रम बढ्दा तापक्रम उच्च रहने सम्भावना रहन्छ। चितवनजस्ता तराई तथा भित्री मधेशका जिल्लाहरूमा गर्मीको प्रभाव अझ बढी महसुस हुने गरेको छ।

मौसम विभागको तथ्यांकअनुसार यस वर्ष चितवनमा हालसम्मकै उच्च तापक्रम वैशाख ९ गते रेकर्ड गरिएको थियो। उक्त दिन जिल्लाको तापक्रम ३९ दशमलव २ डिग्री सेल्सियस पुगेको थियो, जुन यस वर्षको सबैभन्दा बढी मापन गरिएको तापक्रम हो।

अघिल्लो वर्ष भने चितवनको अधिकतम तापक्रम अझै उच्च पुगेको थियो। विभागका अनुसार २०८० सालमा जिल्लाको तापक्रम ३९ दशमलव ८ डिग्री सेल्सियससम्म पुगेको रेकर्ड छ।

स्वास्थ्यकर्मीहरूले अत्यधिक गर्मीका बेला पर्याप्त पानी पिउन, लामो समयसम्म घाममा नबस्न तथा आवश्यक सावधानी अपनाउन आग्रह गरेका छन्। तापक्रम अझै बढ्न सक्ने सम्भावना रहेकाले विशेषगरी बालबालिका, ज्येष्ठ नागरिक तथा दीर्घरोगीहरूले गर्मीबाट बच्ने उपायहरू अपनाउनुपर्ने सुझाव दिइएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै