चितवन । चितवनमा गएराति भएको सवारी दुर्घटनामा दुई युवाको मृत्यु भएको छ। जिल्ला प्रहरी कार्यालय चितवनका अनुसार भरतपुर महानगरपालिका–१५ स्थित अतिथि पार्टी प्यालेस नजिक राति करिब १:४० बजे ट्रक र स्कुटर एकआपसमा ठोक्किँदा दुर्घटना भएको हो।

प्रहरीका अनुसार भरतपुरबाट रामपुरतर्फ जाँदै गरेको ना ५ख ५८१६ नम्बरको ट्रकले सोही दिशामा अघि बढिरहेको बा.प्र. ०६–००४ प ७२४८ नम्बरको स्कुटरलाई पछाडिबाट ठक्कर दिएको थियो। ठक्करपछि स्कुटरमा सवार दुवै युवक गम्भीर घाइते भएका थिए।

दुर्घटनामा मृत्यु हुनेमा भरतपुर महानगरपालिका–२६, दिव्यनगर निवासी २२ वर्षीय अशोक भण्डारी र लमजुङ स्थायी घर भई हाल भरतपुर महानगरपालिका–२० मा बसोबास गर्दै आएका १९ वर्षीय राजिब गुरुङ रहेका छन्। अशोक भण्डारी स्कुटर चालक थिए भने राजिब गुरुङ पछाडि सवार थिए।

दुर्घटनापछि स्थानीयवासी र सुरक्षाकर्मीको सहयोगमा घाइते दुवैलाई तत्काल उपचारका लागि अस्पताल लगिएको थियो। तर उनीहरूको अवस्था अत्यन्त गम्भीर रहेकाले उपचारकै क्रममा आज बिहान करिब ३ बजे चिकित्सकले मृत घोषणा गरेका थिए।

घटनाबारे जानकारी दिँदै प्रहरीले दुर्घटनाको कारणबारे अनुसन्धान सुरु गरिएको जनाएको छ। दुर्घटनामा संलग्न ट्रक र चालकलाई नियन्त्रणमा लिइएको तथा आवश्यक कानुनी प्रक्रिया अघि बढाइएको प्रहरीको भनाइ छ।

रातिको समयमा भएको उक्त दुर्घटनाले स्थानीय क्षेत्रमा शोकको वातावरण सिर्जना गरेको छ। प्रहरीले सवारी चालकहरूलाई गति नियन्त्रणमा राख्न, ट्राफिक नियमको पालना गर्न तथा विशेषगरी रातिको समयमा थप सतर्कता अपनाउन आग्रह गरेको छ। दुर्घटनाको विस्तृत विवरण संकलन गर्ने कार्य जारी रहेको प्रहरीले जनाएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै