चितवन । चितवनमा जंगली हात्ती ‘ध्रुवे’ को आक्रमणमा ज्यान गुमाएका परिवारलाई नेपाली कांग्रेस चितवनले आर्थिक सहयोग उपलब्ध गराएको छ। पार्टीले पीडित परिवारलाई ३० हजार रुपैयाँ सहयोगस्वरूप हस्तान्तरण गरेको हो।

नेपाली कांग्रेस चितवनका प्रतिनिधिहरू बुधबार पीडित परिवारको घरमै पुगेर राहतस्वरूप उक्त रकम हस्तान्तरण गरेका हुन्। यस दुःखद घटनाप्रति गहिरो समवेदना व्यक्त गर्दै पार्टीले शोकसन्तप्त परिवारलाई यस कठिन समयमा साथ र सहयोग रहने प्रतिबद्धता जनाएको छ।

गत शनिबार राति करिब ११ बजेतिर भरतपुर महानगरपालिका–२३ बेलहट्टास्थित पूर्ण बोटेको घरमा जंगली हात्ती प्रवेश गरेको थियो। घरभित्र सुतिरहेका बेला हात्तीले आक्रमण गर्दा पूर्ण बोटेकी २५ वर्षीया श्रीमती आशिका बोटे र ४ वर्षीय छोरा भरत बोटेको घटनास्थलमै मृत्यु भएको थियो। घटनाले स्थानीय समुदायलाई स्तब्ध बनाएको छ भने पीडित परिवार शोकमा डुबेको छ।

स्थानीयवासीका अनुसार उक्त हात्ती केही समययता मानव बस्ती आसपास देखिँदै आएको थियो। वन्यजन्तुको बढ्दो आवतजावतका कारण स्थानीय बासिन्दामा त्रासको वातावरण सिर्जना भएको छ। उनीहरूले मानव–वन्यजन्तु द्वन्द्व न्यूनीकरणका लागि सम्बन्धित निकायले प्रभावकारी र दीर्घकालीन उपाय अपनाउनुपर्ने माग गरेका छन्।

घटनापछि स्थानीय जनप्रतिनिधि, विभिन्न राजनीतिक दल तथा सामाजिक संघ–संस्थाका प्रतिनिधिहरू पीडित परिवारलाई भेट्न पुगेका छन्। उनीहरूले राहत तथा पुनर्स्थापनाका लागि राज्यले आवश्यक सहयोग गर्नुपर्नेमा जोड दिएका छन्। साथै, जंगली हात्तीको जोखिम नियन्त्रण, बस्तीको सुरक्षा तथा प्रभावित परिवारलाई उचित राहत र क्षतिपूर्ति उपलब्ध गराउन सम्बन्धित निकायसँग माग गरिएको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै