तनहुँ । मनसुन सक्रिय भएसँगै पृथ्वीराजमार्गको मुग्लिन–पोखरा खण्ड अत्यन्तै जोखिमपूर्ण बनेको छ । राजमार्ग स्तरोन्नतिका लागि भइरहेको कटान र लगातारको वर्षाका कारण तनहुँ खण्डका दर्जनौँ स्थानमा पहिरो खस्ने र ढुङ्गा खसिरहने जोखिम बढेको हो ।

जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक द्वारिकाप्रसाद घिमिरेका अनुसार मुसेखोला, घाँसीकुवा, छिर्कने, देउराली, विमलनगर, ढापटार लगायतका दर्जनौँ ठाउँमा पटक–पटक पहिरो खस्ने गरेको छ । प्रहरी नायब उपरीक्षक घिमिरेले भन्नुभयो, ‘‘हिजो आँबुखैरेनी–२ मा लेदो पहिरो हटाएर र बिमलनगरको ढुङ्गा हटाएरु सडक सञ्चालनमा ल्याइएको थियो । मुग्लिन–पोखरा खण्डमा स्तरोन्नतिका लागि सडक खनिएकाले पानी पर्नासाथ पहिरो खसेर राजमार्ग जुनसुकै बेला अवरुद्ध हुन सक्ने अवस्था छ ।’’

विमलनगरस्थित सिद्धगुफा विकास समितिका अध्यक्ष लालकुमार श्रेष्ठले चुनपहरा क्षेत्रमा वर्षा निरन्तर भइरहेकाले पहाडबाट ढुङ्गा खस्ने जोखिम कायम नै रहेकोले सर्तक रहनु पर्ने बताउनुभयो ।

राजमार्ग तथा तटीय क्षेत्रमा जोखिम बढेपछि जिल्ला प्रशासन कार्यालय तनहुँले उच्च सतर्कता अपनाउन सार्वजनिक अपिल जारी गरेको छ । प्रमुख जिल्ला अधिकारी शिवलाल तिवारीले सुरक्षा निकाय, सडकसम्बन्धी कार्यालय तथा स्थानीय तहलाई ‘हाइ अलर्ट’ (उच्च सतर्क) अवस्थामा राखिएको जानकारी दिनुभयो ।

प्रमुख जिल्ला अधिकारी तिवारीले भन्नुभयो, “राष्ट्रिय विपद् जोखिम न्यूनीकरण तथा व्यवस्थापन प्राधिकरण र जल तथा मौसम विज्ञान विभागको चेतावनी अनुसार मर्स्याङ्दी, सेती, मादी, त्रिशूली, कालीगण्डकी लगायतका नदीमा बहाव बढेको छ । सडक र नदी किनारका नागरिक विशेष सतर्क रहन जरुरी छ । यात्रुहरूले सडकको अवस्था बुझेर मात्रै यात्रा सुरु गरून्, अन्यथा अत्यावश्यक कामबाहेक यात्रा नगर्न अनुरोध गरेका छौं ।’’

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै

उत्कृष्ट नतिजा दिलाउने अङ्कुरम् एकेडेमीका विषयगत शिक्षक सम्मानित