काठमाडौं । काठमाडौँ उपत्यकाको मुख्य प्रवेशद्वारमा बन्ने भनिएको देशकै पहिलो आधुनिक सुरुङमार्ग आगामी साउनभित्रै सञ्चालनमा ल्याउने तयारी गरिएको छ।

निर्माण कार्य अन्तिम चरणमा पुगेसँगै नागढुंगा सुरुङमार्ग आयोजनाले यसको सञ्चालन र प्रवर्द्धनका लागि कसरत तीव्र पारेको हो।

यसै क्रममा सुरुङमार्गबारे जनचेतना जगाउने उद्देश्यले शनिबार सुरुङभित्रै विशेष दौड तथा पदयात्रा कार्यक्रम आयोजना गरियो। सडक विभाग र जापान अन्तर्राष्ट्रिय सहयोग नियोग (जाइका) नेपालको संयुक्त आयोजनामा ‘नागढुंगा टनेल रन एन्ड वाक’ गरिएको हो। आयोजनाका निर्देशक सौजन्य नेपालका अनुसार सर्वसाधारणलाई सुरुङमार्गको उपयोगिता र महत्वबारे जानकारी गराउन यो प्रवर्द्धनात्मक कार्यक्रम गरिएको हो।

निर्माणमा ढिलाइ र चुनौती

कुल २ हजार ६८८ मिटर लम्बाइ रहेको यो नागढुंगा–नौबिसे सुरुङमार्ग सुरुवाती सम्झौताअनुसार सन् २०२३ को अप्रिल २६ भित्रै बनिसक्नुपर्ने थियो। तर, निर्माण कम्पनीको ढिलासुस्ती र स्थानीय बासिन्दाको निरन्तरको अवरोधका कारण आयोजना सम्पन्न हुन केही वर्ष ढिलाइ भएको हो। अनेकन् बाधा र व्यवधानलाई पन्छाउँदै अन्ततः आउँदो साउन महिनाभित्रै सुरुङमा गाडी गुडाउने गरी काम भइरहेको निर्देशक नेपालले दाबी गर्नुभयो।

६० प्रतिशत सवारीले सुरुङ प्रयोग गर्ने अनुमान

हाल नागढुंगा–नौबिसे नाका हुँदै दैनिक औसतमा आठ हजारभन्दा बढी साना तथा ठूला सवारीसाधन काठमाडौँ आवतजावत गर्ने गर्छन्। सुरुङमार्ग पूर्ण रूपमा सञ्चालनमा आएपछि यीमध्ये करिब ६० प्रतिशत सवारीसाधन सुरुङभित्रैबाट गुड्ने अनुमान आयोजनाको छ। सुरुङमार्गको प्रयोगले घण्टौँ हुने ट्राफिक जाम हट्ने, समयको बचत हुने र इन्धनको खर्चसमेत कटौती हुने विश्वास लिइएको छ।

यद्यपि, सुरक्षा र प्राविधिक कारणलाई ध्यानमा राख्दै यो सुरुङमार्गमा दुईपांग्रे सवारीसाधन (मोटरसाइकल र स्कुटर) लाई भने चल्न नदिइने आयोजना कार्यालयले स्पष्ट पारेको छ।

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै

उत्कृष्ट नतिजा दिलाउने अङ्कुरम् एकेडेमीका विषयगत शिक्षक सम्मानित