चितवन । चितवन जिल्ला दुग्ध उत्पादक सहकारी संघले सञ्चालन गर्दै आएको डेरी मार्टको चौँथो शाखा भरतपुर महानगरपालिका–१२, टाउन चोकमा सोमबारदेखि औपचारिक रूपमा सञ्चालनमा आएको छ। स्थानीय उपभोक्तालाई शुद्ध, ताजा र गुणस्तरीय दुग्धजन्य पदार्थ सहज रूपमा उपलब्ध गराउने उद्देश्यले सहकारीले डेरी मार्टको सेवा विस्तार गरेको हो।
नयाँ शाखाको उद्घाटन कार्यक्रममा बोल्दै भरतपुर महानगरपालिका वडा नं. १२ का अध्यक्ष लेखराज पन्त (हरि)ले स्थानीय किसानले उत्पादन गरेको दूध तथा दुग्धजन्य पदार्थको बजारीकरणमा डेरी मार्टले महत्वपूर्ण योगदान पुर्याउने विश्वास व्यक्त गरे।
‘स्थानीय किसानले उत्पादन गरेका दूध तथा शुद्ध दुग्धजन्य उत्पादनलाई सीधै उपभोक्तामाझ पुर्याउने यो प्रयास सराहनीय छ,’ उनले भने, ‘यसबाट किसानले उचित मूल्य पाउनुका साथै टाउन चोक र आसपासका उपभोक्ताले शुद्ध तथा स्वास्थ्यवद्र्धक दुग्धजन्य पदार्थ उपभोग गर्ने अवसर पाउनेछन्।’ उनले डेरी मार्ट सञ्चालनमा वडा कार्यालयका तर्फबाट आवश्यक सहयोग र सहकार्य निरन्तर रहने प्रतिबद्धता जनाए।
कार्यक्रममा चितवन जिल्ला दुग्ध उत्पादक सहकारी संघका अध्यक्ष किशोर बगालेले किसानको हित र उपभोक्ताको स्वास्थ्यलाई प्राथमिकतामा राखेर डेरी मार्ट सञ्चालन गरिएको बताए। किसानले उत्पादन गरेको दूधको बजारीकरण सुनिश्चित गर्नुका साथै उपभोक्तालाई गुणस्तरीय र मिसावटमुक्त दुग्धजन्य पदार्थ उपलब्ध गराउनु संघको मुख्य उद्देश्य रहेको उनको भनाइ थियो।
‘यसअघि सञ्चालनमा रहेका शाखाबाट प्राप्त जनविश्वास र उत्साहजनक प्रतिक्रियाका कारण टाउन चोकमा चौँथो शाखा विस्तार गर्न सफल भएका हौँ,’ अध्यक्ष बगालेले भने, ‘आगामी दिनमा पनि गुणस्तरमा कुनै सम्झौता नगरी सेवा विस्तार गर्दै लैजानेछौँ।’
डेरी मार्टमा स्थानीय किसानबाट संकलित शुद्ध दूध, दही, घिउ, पनिर, नौनीलगायत विभिन्न दुग्धजन्य पदार्थ बिक्रीका लागि राखिएको संघले जनाएको छ। मार्टमा नौनी घिउ प्रतिकिलो ९०० रुपैयाँ र घिउ प्रतिलिटर १ हजार २०० रुपैयाँमा उपलब्ध गराइएको छ।
टोल विकास संस्थाकी अध्यक्ष गायत्री श्रेष्ठले डेरी मार्टले सर्वसुलभ मूल्य र गुणस्तरमा विशेष ध्यान दिनुपर्ने बताइन्। स्थानीय टोलमै डेरी मार्ट सञ्चालनमा ल्याएकोमा उनले सहकारी संघलाई धन्यवाद दिइन्।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.