चितवन । रसुवामा आएको विनाशकारी बाढीपहिरोबाट प्रभावित तथा पीडित नागरिकको सहयोगार्थ भरतपुर–२, क्षेत्रपुरस्थित फोर्ब्स कलेजले रक्तदान कार्यक्रम आयोजना गरेको छ। “For Humanity, For Rasuwa” भन्ने मूल नाराका साथ आयोजित कार्यक्रममा विद्यार्थी, शिक्षक, कर्मचारी तथा स्थानीय नागरिकको उत्साहजनक सहभागिता रहेको थियो।
कार्यक्रममा कुल ५० जना रक्तदाताले रक्तदान गरेका छन्। विपद्का समयमा घाइते तथा बिरामीको उपचारका लागि रगतको आवश्यकता पर्न सक्ने अवस्थालाई मध्यनजर गर्दै मानवीय सेवाको भावना अभिवृद्धि गर्ने उद्देश्यले कार्यक्रम आयोजना गरिएको कलेजले जनाएको छ।

रक्तदान कार्यक्रममा सहभागी रक्तदाताहरूले प्राकृतिक विपद्का कारण कठिन परिस्थितिमा रहेका नागरिकको जीवनरक्षामा आफ्नो सानो प्रयासले समेत महत्वपूर्ण योगदान पुर्‍याउन सक्ने विश्वास व्यक्त गरेका थिए। उनीहरूले रक्तदानलाई सामाजिक सेवासँगै विपद्मा परेका नागरिकप्रति ऐक्यबद्धता र मानवीय संवेदना प्रकट गर्ने प्रभावकारी माध्यमका रूपमा लिएका छन्।

कलेजका अनुसार विपद्का बेला रगतको अभाव हुन नदिन तथा आवश्यक परेका बिरामीलाई समयमै रगत उपलब्ध गराउन यस्ता कार्यक्रम महत्वपूर्ण हुन्छन्। कार्यक्रममा सहभागीहरूले नियमित रक्तदानले समाजमा सेवाभाव र सहयोगको संस्कार विकास गर्नसमेत मद्दत पुग्ने धारणा राखेका थिए।

रसुवामा बाढीपहिरोका कारण प्रभावित परिवारप्रति ऐक्यबद्धता जनाउँदै आयोजना गरिएको यस कार्यक्रमले “रक्तदान गरौँ, जीवन बचाऔँ” भन्ने सकारात्मक सन्देश प्रवाह गरेको छ। कार्यक्रमले विपद्को समयमा समुदाय, शैक्षिक संस्था र नागरिकबीच सहकार्य तथा सहयोगको भावना अझ बलियो बनाउनुपर्ने आवश्यकतासमेत औँल्याएको छ।

फोर्ब्स कलेजले शिक्षा प्रदान गर्ने आफ्नो मुख्य जिम्मेवारीसँगै सामाजिक उत्तरदायित्वलाई पनि प्राथमिकतामा राख्दै आएको जनाएको छ। कलेजले आगामी दिनमा पनि सामाजिक सेवा, मानवीय सहयोग तथा समुदाय केन्द्रित विभिन्न कार्यक्रमलाई निरन्तरता दिने प्रतिबद्धता व्यक्त गरेको छ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै