चितवन । नेपाल मगर विद्यार्थी संघ जिल्ला समिति चितवनले स्थापना गरेको मगर विद्यार्थी अक्षयकोषमा लक्षित रकम संकलन भएको छ। अक्षयकोषका अध्यक्ष निर्मल थापामगरले एक पत्रकार सम्मेलनमार्फत कोषमा १० लाख ७ हजार ६ सय ८० रुपैयाँ संकलन भएको जानकारी दिएका हुन्। पत्रकार सम्मेलनमा बोल्दै अध्यक्ष थापामगरले कोषको लक्ष्य पूरा गर्न सहयोग र योगदान पुर्याउने सम्पूर्ण सरोकारवाला, सहयोगी तथा शुभचिन्तकहरूलाई धन्यवाद तथा आभार व्यक्त गरे। उनका अनुसार वि।सं। २०५१ मा नेपाल मगर विद्यार्थी संघको राष्ट्रिय केन्द्रीय समिति स्थापना भएपछि चितवनमा पनि संगठन विस्तारको अभ्यास सुरु भएको थियो। वि.सं. २०६०/६१ तिर जिल्ला समितिले पूर्णता पाई विभिन्न क्याम्पस तथा उच्च माध्यमिक विद्यालयहरूमा संगठन विस्तार भएको उनले बताए।
विशुद्ध सामाजिक संगठनका रूपमा रहेको यस संघलाई आर्थिक अभावका बिच सहयोग र रसिदका भरमा जीवित राख्नुपर्ने बाध्यता रहेकाले दीर्घकालीन कोषको आवश्यकता महसुस गरिएको थियो। सोही अनुरूप २०६६ सालमा तत्कालीन अध्यक्ष निर्मल थापामगरको पहलमा कल्याणकारी कोष स्थापना गरी काम सुरु गरिएकोमा २०७५ मा देउसी–भैलो लगायतका कार्यक्रममार्फत रकम संकलन गरी अक्षयकोषको रूपमा परिणत गरिएको हो। कोष सञ्चालनलाई चुस्त, दुरुस्त, पारदर्शी र व्यवस्थित बनाउन ‘मगर विद्यार्थी अक्षयकोष सञ्चालन निर्देशिका २०७६’ तयार गरी लागू गरिएको छ। हाल कोषका सम्पूर्ण गतिविधिहरू सोही निर्देशिका बमोजिम भइरहेका छन्। अक्षयकोषका मुख्य उद्देश्यहरू चितवन तथा छिमेकी जिल्लाका विपन्न, जेहेन्दार, जेहेन्दार, अनाथ तथा अशक्त मगर विद्यार्थीहरूलाई शैक्षिक गुणस्तर, व्यक्तित्व र क्षमता विकासमा सहयोग पुर्याउने रहेको छ ।
त्यसैगरी, उत्कृष्ट नतिजा ल्याउने विद्यार्थीहरूलाई नगदसहित ‘एजुकेशन अवार्ड’द्वारा सम्मानित गर्ने, विपन्न तथा असहाय विद्यार्थीहरूलाई शैक्षिक तथा भौतिक सामग्री सहयोग प्रदान गर्ने र विद्यार्थीहरूका लागि नेतृत्व, सीपमूलक र उद्यमशीलतासम्बन्धी तालिमहरू आयोजना गरी आत्मनिर्भर बनाउन प्रेरित गर्ने उद्धेश्य रहेको छ । मगर भाषा, कला र संस्कृतिको प्रवर्धन तथा संरक्षणका कार्यक्रमहरू सञ्चालन गर्ने र रक्तदान, स्वास्थ्य शिविर तथा स्वास्थ्य सचेतनासम्बन्धी सामाजिक कार्यहरू सञ्चालन गर्ने उद्धेश्य पनि अक्षयकोषको रहेको छ ।
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.