चितवन । लामो समयदेखि नोक्सान व्यहोरेका कुखुरा पालक किसानहरु आफ्नो उत्पादनले मूल्य पाउन थालेपछि लाभान्वित भएका छन् । कोरोना संक्रमणका कारण बजार प्रभावित हुँदा किसानले लागत मूल्यभन्दा कममा बिक्री गर्नु परेको थियो ।

कुखुराको अण्डा, मासु र चल्लाको लागत मूल्यभन्दा बढीमा किसानहरुले बिक्री गर्न पाएसँगै लाभान्वित भएका हुन् । कोरोना संक्रमणको बेला झण्डै पाँच महिना चल्ला उत्पादन गरेर पनि नष्ट गरेका ह्याचरी उद्योगहरुले चल्लाको उचित मूल्य पाएका छन् । नेपाल ह्याचरी उद्योग संघका केन्द्रीय अध्यक्ष टिकाराम पोखरेलका अनुसार आज उद्योगले रु.७० प्रतिगोटा ब्रोईलर चल्ला बिक्री गरेका छन् । उहाँका अनुसार कोरोना संक्रमणको समयमा झण्डै पाँच महिना चल्ला बिक्री नभएर नष्ट गर्नु परेको थियो ।

त्यस्तै लेयर्सको चल्ला प्रतिगोटा रु.१२५ र कोईलरको रु.७० मा बिक्री भईरहेको छ । किसानले चल्ला राख्न थालेपछि बिक्री हुन थालेको हो । नेपालमा ३२४ वटा ह्यचरी उद्योग रहेका छन् । हाल सातामा ३० देखि ३५ लाख ब्रोईलर चल्ला उत्पादन हुने गर्दछ । यसको माग ४० लाखभन्दा माथि रहेको पोखरेलको भनाई छ । उत्पादन कम भएका कारण मूल्य बढी हुँदा पनि सोचे जति मुनाफा लिन भने नसकिएको उहाँको भनाई छ । उत्पादन राम्रो हुँदा ब्रोईलर चल्लाको लागत मूल्य रु.५६ पर्ने संघको तथ्यांकमा उल्लेख छ ।

अण्डाको मूल्य पनि बढेको छ । हाल प्रतिक्रेट (३० गोटा) रु.३४५ मा बिक्री हुने गरेको छ । नेपाल अण्डा उत्पादक संघका केन्द्रीय अध्यक्ष शिवराम केसीका अनुसार अण्डाको लागत मूल्य रु.११.५३ हो । किसानले लामो समयपछि अण्डाको उचित मूल्य पाएको केसीले बताउनुभयो । तीन वर्ष अघि प्रतिक्रेट रु.३६० पुगेको अण्डा क्रमशः घटेर लागत मूल्यभन्दा निकै कममा झरेको थियो ।

कोरोना संक्रमणको समयमा समेत रोग प्रतिरोधी क्षमता बढ्ने भएकाले यसको खपत बढेको उहाँ बताउनुहुन्छ । अण्डाको मूल्य अरु बढ्ने किसानको अपेक्षा छ । हाल देशभरमा २ हजार ७०० किसान प्रत्यक्ष रुपमा अण्डा उत्पादनमा संलग्न छन् । दैनिक अण्डाको उत्पादन ३० लाखदेखि ३२ लाखसम्म रहेको संघको तथ्यांक छ ।

कोरोना संक्रमणको समयमा निकै घटेको कुखुराको मासुको मूल्य अहिले बढेको छ । नेपाल दाना अण्डा बितरक संघका केन्द्रीय अध्यक्ष तेजनारायण पाण्डेका अनुसार तयारी मासु प्रतिकिलो रु.३३० मा बिक्री भएको छ । किसानले जिउँदो कुखुराको फार्म मूल्य रु.२१० हाराहारी पाएका छन् । लागत मूल्यभन्दा बढी भएको उहाँले जानकारी दिनुभयो ।

कोरोना संक्रमणको समयमा जिउँदो कुखुरा रु.९० प्रतिकिलोमा समेत बिक्री गर्न किसान बाध्य भएका थिए । कुखुरा नबिकेपछि लामो समय पाल्न बाध्य हुँदा किसानले ठूलो नोक्सान व्यहोर्नु परेको थियो । कतिपय किसान विस्थापित समेत भएको पाण्डेको भनाई छ । उहाँले भन्नुभयो “कुखुरा पाल्ने किसानको लागत मूल्यभन्दा बढी आम्दानी होस् भनेर हामीले आम जनतालाई मासु र अण्डाको बारेमा प्रचारप्रसार समेत गरेका छौं ।”

कुखुराजन्य उत्पादनको मूल्य बढिरहँदा दानाको मूल्य समेत बढेपछि लागत मूल्य थपिएको छ । नेपाल दाना उद्योग संघका केन्द्रीय बरिष्ठ उपाध्यक्ष शंकरप्रसाद कँडेलका अनुसार हालसालै मकै र भटमासको मूल्य बढेको छ । मकैमा प्रतिकिलो रु.७ र भटमासमा रु.१२ बृद्धि भएको उहाँले जानकारी दिनुभयो । दानामा ८० प्रतिशत मकै र भटमास प्रयोग हुने गर्दछ । कच्चा पदार्थको मूल्य धेरै बढेपनि किसानको अवस्था हेरेर दानामा रु.३ प्रतिकिलो बढाईएको उहाँले जानकारी दिनुभयो ।

दानाको अधिकांश कच्चा पदार्थ भारतलगायतका देशबाट आउने गर्दछ । जसका कारण मूल्य अन्तर्राष्ट्रिय बजारमा निर्भर हुन्छ ।

नेपालमा कुखुराजन्य व्यवसायमा अरबौंको लगानी रहेको छ ।

क्युएफएक्स जलमाको तेस्रो हल शुक्रबारदेखि सञ्चालनमा आउने

मंसिर ३ गते सौराहामा पहिलो पटक घन्किदै नेपथ्य

चितवनमा बिल्ड नेपाल एक्स्पोको तयारी शुरु, स्टल बुकिङ्ग धमाधम गरिदै