तपाई आफै एउटा धार्मिक , अध्यात्मिक स्वभावको व्यक्ति तपाईले यो बिषम परिस्थितिमा के कस्तो मानवीय धर्म निभाउनु भएको छ ?

म एउटा व्यवसायी त हो तर यो समाजमा एउटा नागरिकको हिसाबले जिम्मेवारी र भूमिका निर्वाह गर्नुपर्छनै । त्यसैले मेरो व्यवसायको स्थापना कालदेखिनै मैले विभिन्न सामाजिक दायित्व पुरा गर्दै आएको छु । चाहे भुकम्पका बेला होस , अन्य दैवी प्रकोप होस मैले आफ्नो उत्तरदायित्व निभाउंँदै आएको छु । पैसा सबैलाई चाहिन्छ तर यसको उपयोग गर्न पनि जान्नुपर्छ । यो स्थिर रहने बस्तु होइन । यसतै विपत्ती परेका बेला र गरीब दुःखीहरुलाई सहयोग गर्न सकेमात्र धन कमाएको सार्थकता हुन्छ । मैले दर्जनौं सस्थाहरुलाई विगतका बर्षहरु देखि नै सहयोग गर्दै आएको छु । म आफैपनि आधा दर्जन सामाजिक तथा परोपकारी संस्थामा आवद्ध छु । अहिले हाम्रो देश, समाज विषम परिस्थितिमा छ । एकातिर रोगको त्रास उत्तिकै छ त अर्कोतिर भोकले पनि मानिसलाई उत्तिकै सताएको छ । हुनेखानेले त यो समस्या सजिलै टार्लान तर हुंँदा खानेको अवस्था कारुणिक बन्दै गएको छ । उनीहरुले काम गर्छु भन्दा काम पाएका छैनन । यस्ता समुदाय , घर परिवारलाई मैले निःशुल्क खाद्यान्न बस्तु सहयोग गर्दै आएको छु । काम गरेर खान नसक्ने, दैनिक ज्यालादारी मजदुरी गर्नेलाई हालसम्म १५० घरपरिवारलाई केही दिन को लागि पुग्ने खाद्य वस्तु वितरण गरिसके । अहिले पनि मैले यो सहयोगलाई निरन्तरता दिने नै छु । त्यसैले धन हुनेले सहयोग गरेन वा गर्न चाहेन भने उसले कमाएको धनको अर्थ हुदैन । धन त बांँचुन्जेल सम्म काम लाग्ला तर धर्म , मानव सेवा परोपकार जुगौंसम्म जीवन्त रहन्छ ।

तपाईले पछिल्लो बर्षहरुमा व्यवसाय भन्दा पनि समाजिक र धार्मिक कार्यलाई बढी समय दिनुभएको छ किन?

समय र परिस्थिति अनुसार मानिसका काम कर्तव्य एकैतवरले चल्दैनन । यतिबेला मेरो लगभग रिटायर्ड लाइफ हो मैले मेरो व्यवसाय स्थापित गराइसकेर आफ्ना छोराहरुलाई जिम्मा दिएको छु । अहिले मेरो दिनचर्या पहिले भन्दा बिल्कुल फरक छ । बिहान नित्यकर्म गरी ध्यान पुजापाठ, योगालाई समय दिने गरेको छु । दिउसो धार्मिक अनुष्ठानका कार्य र सामाजिक कार्यमा आफ्नो समय दिएको छु । जसले गर्दा मलाई आनन्द मिल्छ । मानव सेवा जस्तो सेवा अरु केही हुदैन । आफ्नो लागि त अरु प्राणी पनी बांँचिरहेका हुन्छ मानिस प्राणी मध्येको पनि सर्वश्रेष्ठ प्राणाी हो । हामी विवेकले चल्नुपर्दछ । आफुले कमाएको केही रकम दीनदुःखीको सेवामा लगाए मात्र जीवन अर्थपूर्ण हुन्छ । धन कमाएर अहँंकारिता भयो भने मानिसलाई त्यही धनले सखाप पार्छ । त्यसैले बांँकी जीवन उपलब्धीमुलक होस भन्ने हेतुले धार्मिक तथा समाजिक कार्यलाई बढी जोड दिएको हुंँ ।

तपाईले समाजसेवालाई अगाडि लैजान व्यक्तिगत तथा संस्थागत रुपमा पनि सहयोग गर्दै आउनु भएको छ ? सामाजिक कार्यलाई कसरी अगाडी बढाइरहनु भएको छ?

मैले व्यक्तिगत रुपमा पनि सहयोग गर्दै आएको छु यसको साथसाथै मैले संस्थागत रुपमा दर्ता गरेर नै यसलाई निरन्तर अगाडी बढाइरहेको छु मेरो उमाशंकर ट्रष्टमार्फत विभिन्न सामाजिक संस्थालाई नियमित रुपमा सहयोग गरिरहेको छु । अर्को मैलै बास नपाएका अन्य बटुवा, यात्रीको लागि मेरो आमा बुबाको नाममा धर्मशाला निर्माण गरेको छु । जहांँ अतिनै न्यूनतम शुल्कमा मानिसहरुले बास बस्न पाउने छन । यस्तै मैले केही बर्ष अघिदेखि वागेश्वरी गौ संरक्षण केन्द्रमा रहेका स्थानीय गाईको संरक्षणको लागि सहयोग गरेको छु । त्यहाँ गाईराख्ने गोठ निर्माण देखि त्यहांँ रहेका हेरालुलाई खान बस्न र पारिश्रमिक व्यवस्थापनको लागि पनि सहयोग गर्दै आएको छु । यस्तै म नेपाल राष्ट्रिय मारवाडी परिषदको केन्द्रीय उपाध्यक्ष पनि हो । यस संस्थामार्फत दर्जनौं सामाजिक कार्य , सहयोग गर्दैै आएको छु । यस्तै भरतपुरमा रहेको मानवसेवा आश्रमलाई पनि खाद्यान्न हरेक बर्ष पटक पटक सहयोग गर्दै आएको छु ।

भविष्यमा तपाईको योजना के छ?

म बिस्तारै बुढ्यौली टेकिसके अब मेरो रिटायर्ड जीवन हो । यस जिन्दगीलाई कसरी सार्थक र उपलब्धिमुलक बनाउने भन्ने बिषयमा केन्द्रीत रहन्छु । म ब्रम्हाकुमारी राजयोग सेवा केन्द्रको पनि सदस्य हो । दैनिक केही समय यस केन्द्रमा पनि बित्छ । बाँकी समय मेरो क्षमताले भ्याएसम्म सामाजिक कार्य , धार्मिक कार्य तथा दीनदुःखीको सेवामा बिताउने छु ।

अन्त्यमा देश कोरोना भाइरसको त्रासमा रहेको बेला र नयांँ बर्षको अवसरमा के सन्देश दिन चाहनुहुन्छ ?

अहिले देशमा दुख परिरहेको बेला यस कोराना भाइरससंँग हामी जुधिरहेका छौं । यसलाई परास्त गर्न एउटै मात्र उपाय हामीसंँग छ त्यो हो । सरकारले गरेको लकडाउन पालना गर्ने, सामाजिक दुरी कायम राख्ने,सरसफाइमा ध्यान दिने र स्वस्थकर खाना खाने । त्यसैले म आफूले सक्दो आफ्ना टोलछरछिमेकमा रहेका विपन्न र ज्याला मजदुरहरुलाई सहयोग गर्न अनुरोध गर्दछ । नयांँ बर्षले आम नेपाली दाजुभाई, हाम्रा उपभोक्ता , बिक्रेता , नातेदार तथा शुभचिन्तकहरुमा भगवानले रोगलाई परास्त गर्ने क्षमता प्रदान गरुन । २०७७ सालले हरेकको घरमा सुख समृद्धि, प्रगति र शान्ति ल्याओस यही छ मेरो नयांँ बर्षको शुभकामना !