काठमाडौँ । गायक रामकृष्ण ढकालले कोरोना संक्रमित नेपालीको उपचारका लागि १८ लाख सहयोग जुटाएका छन् । सांगीतिक कार्यक्रमका लागि अमेरिका पुगेका रामकृष्णले नेपालमा कोरोनाका बिरामीलाई अक्सिजन सिलिन्डर अभाव भएको खबर सुनेलगत्तै नेपाली तथा नेपाली भाषी भुटानीसँग अपिल गरेर पहिलो चरणमा १८ लाख रुपैयाँ सहयोग जुटाएका हुन् ।

‘नेपालमा यस्तो विषम परिस्थिति हुँदा म भने सांगीतिक कार्यक्रमको क्रममा अमेरिकामा आएको बेला यतै रोकिएको छु । म विनम्रतापूर्वक राख्न चाहन्छु कि एक नेपाली संगीत साधकका रूपमा आज मेरो जुन परिचय बनेको छ, त्यो सबै नेपाली दाजु/भाइ तथा दिदी/बहिनीको स्नेह, साथ र सद्भावकै कारण बनेको हो ।’

गायक ढकालले सामाजिक सञ्जालमार्फत भनेका छन्, ‘उहाँहरू नेपालमा कोरोनासँग जीवन(मरणको युद्ध लडिरहेका बेला अमेरिकामै रहेकै बेला पनि केही सहयोग पुर्याउन सकिन्छ कि भन्ने पवित्र भावनाले मैले केही दिनअघि अमेरिकामा रहेका मेरा आदरणीय स्रोता/दर्शकमाझ सहयोगको आव्हान गरेको थिएँ मेरो विनम्र अनुरोधमा अमेरिकामा रहेका मनकारी नेपाली तथा भुटानी नेपाली दाजुभाइ तथा दिदीबहिनीहरूले खुला हृदयले सहयोग गर्नुभएको छ ।’

गायक ढकाल स्वयंले पनि ५ सय डलर सहयोग गरेको उल्लेख गरेका छन्। सो क्रममा पहिलो चरणमा जम्मा उक्त रकम महावीर पुनको राष्ट्रिय अविष्कार केन्द्रको नाममा रहेको हिमालय बैंकको खातामा जम्मा गरिएको छ । साथै रकम उठ्ने क्रम जारी रहेकाले दोस्रो चरणको सहयोग पनि यसरी नै काम गरिरहेका संस्थालाई प्रदान गर्ने समेत गायक ढकालले बताएका छन्।

मंसिर ३ गते सौराहामा पहिलो पटक घन्किदै नेपथ्य

बाढी प्रभावित ऋणीलाई बैंकको किस्ता तिर्न पुस मसान्तसम्मको समय

अब सवारी दर्ता तथा नामसारीका लागि धनी स्वयं यातायात कार्यालय जान नपर्ने