चितवन । कोभिड–१९ संक्रमितको संख्या बढ्न थालेसँगै आईसीयूमा उपचार गर्नुपर्ने संक्रमितको संख्या पनि बढ्दै गएको छ।

अहिले सबैभन्दा बढी आईसीयूमा उपचाररत संक्रमित बागमती प्रदेशमा छन्। स्वास्थ्य तथा जनसंख्या मन्त्रालयको तथ्यांकअनुसार, एक सातायता आईसीयूमा उपचार गर्नुपर्ने संक्रमितको संख्या बढ्दै गएको देखिएको छ। दुई साताअघिको तुलनामा आज आईसीयूमा उपचाररत संक्रमितको संख्या झण्डै डेढ सयले बढेको छ।

दुई साताअघि २५ असारमा देशभर ५३९ जनाको आईसीयूमा र १६६ जनाको भेन्टिलेटरमा राखेर उपचार भइरहेको थियो। त्यसको एक सातापछि १ साउनमा पनि ५७८ जनाको आईसीयूमा र १७४ जनाको भेन्टिलेटरमा राखेर उपचार गरिएको थियो। आज भने ६८२ जनाको आईसीयूमा र १७५ जनाको भेन्टिलेटरमा राखेर उपचार भइरहेको स्वास्थ्य मन्त्रालयले जनाएको छ।

पछिल्लो एक सातामा भेन्टिलेटरमा उपचार गर्नुपर्ने संक्रमितको संख्या स्थिर रहे पनि आईसीयूमा उपचार गर्नुपर्ने संक्रमितको संख्या क्रमिक रुपमा बढ्दै आएको छ ।

स्वास्थ्य मन्त्रालयले पछिल्लो केही दिनयता संक्रमितको संख्या बढ्न थालेकाले कोरोनाको तेस्रो लहर आउनसक्ने चेतावनी दिएको छ। नागरिकलाई स्वास्थ्य मापदण्ड पालना गर्न तथा स्वास्थ्य संस्थालाई अक्सिजन र शय्याको व्यवस्था गर्न मन्त्रालयले अनुरोध समेत गरेको छ।

सिएमसी अस्पतालमै दसैँको टीका, बिरामीका निधारमा खुसी र आँखामा भावुकता

जसले चाहेर पनि परिवारसँग दसैँको टीका लगाउन पाउँदैनन्

बिचौलियाको मारमा किसान