काठमाडौं । नेपाल र बंगलादेशबीच जारी दोस्रो मैत्रीपूर्ण खेलको पहिलो हाफ बराबरीमा सकिएको छ । त्रिपुरेश्वरस्थित दशरथ रंगशालामा जारी पहिलो हाफ ०-० को अवस्थामा सकिएको हो । दुबै टोलीले गोलका लागि केही अवसर बनाए पनि सदुपयोग गर्न सकेनन् । खेलको ९ मिनेटमा नेपालले पहिलो मौका चुकायो । डिफेण्डर अमृता जैशीले अगाडी बढेर डिबक्स बाहिरबाट हानेको प्रहार गोलरक्षक रुप्ना चक्माको हातमा पुग्यो । १०औं मिनेटमा अनिता बस्नेतको पासमा सरु लिम्बुले डिबक्स बाहिरबाट हानेको प्रहार चक्माले बाहिर पन्च गरिन् ।

खेलको ७ मिनेटमा बंगलादेशले गोल गर्ने सुनौलो अवसर गुमायो । गोलकिपर अन्जना रानाले डिबक्स भित्र फुत्काएको बललाई श्रीमोती सर्कारले खाली पोस्टमा गोल गर्न सकिनन् । उनको प्रहार अघिनै  डिफेण्डर गीता रानाले बल खोसेकी थिइन् । खेलको ३० मिनेटमा बंगलादेशकी श्रीमोती सर्कारले डिबक्स बाहिरबाट हानेको प्रहार क्रसबारमाथि लागेर बाहिरियो । मुख्य प्रशिक्षक ग्यारी फिलिप्सले रेनुका नगरकोटिको कप्तानीमा पहिलो मैत्रीपूर्ण खेलबाट तीन खेलाडी परिवर्तन गरेका छन् ।

गोलकिपर अन्जना राना मगर, रश्मि घिसिङ र अनिता बस्नेतले सुरुवाती-११ मा स्थान बनाएका छन् । यसअघिको खेलमा एन्जिला तुम्बापो सुब्बा, मन्जली कुमारी  योन्जन र  सबिता राना मगरलाई माैका दिइएको थियो । यसअघि पहिलो मैत्रीपुर्ण खेलमा नेपालले बगलादेशलाई २-१ गोल अन्तरले पराजित गरेको थियो । एएफसी महिला एसिया कप-२०२२ छनोटको तयारीका लागि नेपाल र बंगलादेश मैत्रीपूर्ण  खेल खेलेका हुन् । उज्वेकिस्तानमा हुने समूह एफको खेलमा नेपालले फिलिपिन्ससङ २ असोज र हङकङ सङ ५ असोजमा खेल्नेछ ।

नेपाली टीम त्यसतर्फ भोलि (सोमबार) प्रस्थान गर्नेछ  ।

नेपाली टिम

गोलरक्षक : अन्जना राना मगर
डिफेण्डर : हिरा कुमारि भुजेल,  अमृता जैशी, गिता राना, पुजा राना
मिडफिल्डर : सरु लिम्बू, प्रीति राई, रेणुका नगरकोटी,
स्ट्राइकर : अनिता बस्नेत, बिमला चौधरी, रश्मि घिसिङ

चितवन जिमका सुर्जेले जिते दोस्रो मिस्टर चितवनको उपाधि

बिसिए प्राइड लिग क्रिकेट असोज १८ देखि, खेल तालिका पनि सार्वजनिक

दोस्रो मिस्टर चितवन असोज १६ र १७ गते, तयारी तीव्र