☰

भर्खरै

लोकप्रिय समाचार

नगर र निजी क्षेत्रको सहकार्यमा तुलसीपुरमा गौशाला

  •   शुक्रबार, कार्तिक १९, २०७८ मा प्रकाशित
    • अ
    • अ
    • अ

    दाङ । दाङको तुलसीपुरमा बहुउद्देश्यीय गौशाला सञ्चालनमा आएको छ । सडक चौपायाको संरक्षण र सडक सुरक्षाका लागि जिल्लामा तिहारको अवसर पारी गौशाला सञ्चालनमा ल्याइएको छ । सडकमा छाडा छोडेका गाईहरूलाई संरक्षण र संवर्द्धन गरी सहरलाई सुव्यवस्थित गराउने उद्देश्यले तुलसीपुर उपमहानगरपालिका-१३ फूलबारीमा दुई करोडभन्दा बढी लगानीमा गौशाला सञ्चालनमा आएको हो । शौलालाको शुक्रबार पर्यटन, ग्रामीण तथा सहरी विकास मन्त्री डिल्लीबहादुर चौधरीले शुभारम्भ गरेका छन् ।

    २०७६ सालदेखि निर्माण सुरु भएको तुलसी गौशालाको आधारभूत पूर्वाधार निर्माण भएपछि शुक्रबारदेखि औपचारिक रूपमा गाई व्यवस्थापन थालिएको छ । अहिले गौशालामा ४ सय गाईरहेका छन् । गाईको व्यवस्थापन २०७६ साल देखिनै गर्न थालिएको भए पनि गौशालामै ल्याएर अहिले राख्न थालिएको छ । यसअघि तुलसीपुर-६ को रजौरा अस्थायी रूपमा व्यवस्थापन गरिँदै आएको थियो । तुलसीपुर उपमहानगरपालिकाको सहकार्य, सहयोग शेयर लगानीमा तुलसी गौशाला तथा सरसफाइ व्यवस्थापन बहुउद्देश्यीय सहकारी संस्थाले फूलबारीमा गौशाला सञ्चालनमा ल्याएको हो ।

    सात विगाहक्षेत्र फलमा गौशाला निर्माण गरेर सञ्चालन गरिएको संस्थाका अध्यक्ष वीरबहादुर भण्डारी (मोहन)ले जानकारी दिए । नेपालमा नयाँ प्रक्रिया अवलम्बन गरेर गौशाला सञ्चालन गरेको र यसका लागि सबैको सहयोग सहकार्य तथा अपनत्व आवश्यक रहेको उनले बताए । गौशाला सञ्चालनका लागि अहिले पूर्वाधार पुरा भए पनि गाईहरूको आहारा व्यवहारमा समस्या भएको अध्यक्ष भण्डारीको भनाई छ । मन्त्री चौधरीले गाई हिन्दु धर्मको आस्थाको केन्द्र भएको हुँदा यसको संरक्षण र विकासका लागि प्रदेश सरकारले ध्यान दिने बताए ।

    उनले फूलबारी क्षेत्र कृषिमा मात्रै नभएर शिक्षाको पनि हब बनाउन सकिने बताए । गौशालालाई बहु आयामिक बनाएर गरिबी न्यूनीकरण र पर्यटनसँग जोडन सकिने दाङका प्रमुख जिल्ला अधिकारी हिरालाल रेग्मीले बताए । उनले नमुना योग्य कार्य भएको भन्दै यसलाई पर्यटकीय थलो बनाउन अभियान थाल्नु पर्ने बताए ।

    तुलसीपुर उपमहानगरपालिका वातावरण समितिका संयोजक नवराज लामिछानेले स्थानीय सरकारको सहकार्य रहिरहन बताए । शुभारम्भको अवसरका तथा गाई तिहारको अवसरका गौशालामा भएको गाईहरूको पूजासमेत गरिएको छ । जिल्लामा व्यवस्थित गौशाला नहुँदा छाडा चौपायाले सहर नै कुरूप बनाई रहेको थिए । छाडा चौपाया गौशालामा व्यवस्थित हुन थाले पछि सडकमा सवारी दुर्घटना लगायतका समस्या भने हटेर जाने विश्वास गरिएको छ ।

    लोकप्रिय

    भर्खरै