चितवन । तनहुँको बन्दीपुरमा चितुवाले आक्रमण गरी गम्भीर घाईते भएका बालकको शल्यक्रिया सफल भएको छ । तनहुँको बन्दीपुर गाउँपालिका वडा नं. १ निवासी ३ वर्षिय सुलभ परियारको आज चितवन मेडिकल कलेज शिक्षण अस्पतालमा शल्यक्रिया गरिएको हो । अस्पतालका निर्देशक डा.दयाराम लम्सालका अनुसार बालकको घाँटीमा धेरै ठाउँमा गम्भीर चोट लागेको थियो । घाँटीमा गहिरो चोट भएपनि श्वास नली र रगत बग्ने मुख्य नसामा क्षति हुन नपाएको उहाँको भनाई छ ।

डा. लम्सालले चितुवाको आक्रमणबाट बालकको आँखा, नाक, मुख जस्ता महत्वपूर्ण अंग क्षति हुनबाट जोगिएको बताउनुभयो । उहाँले भन्नुभयो “श्वास नली र घाँटी हुँदै रगत बग्ने मुख्य नसामा क्षति हुन नपाएका कारण शल्यक्रिया सफल भएको छ ।” अस्पतालका डा.सुरेशराज शर्मा, डा. सुमित अधिकारी, डा. नविनकृष्ण यादवको टोलीले शल्यक्रिया गरेको हो । शल्यक्रियामा संलग्न चिकित्सकका अनुसार परियारको घाँटीमा मल्टिपलपञ्चर (ठाउँठाउँमा गहिरो चोट परेको र मासु समेत च्यातिएको) भएको थियो । देव्रे कान र अनुहारमा समेत चोट रहेका कारण टाँका लगाईएको छ भने घाँटीको शल्यक्रिया गरिएको हो ।

आकस्मिक कक्षका चिकित्सक डा.रोहितकुमार गुप्ताले बालक अस्पताल आउँदा आत्तिएको, डराएको र घाउ दुखेको अवस्थामा आएको जानकारी दिनुभयो । निर्देशक डा. लम्सालले बालकलाई केही दिन सघन उपचार कक्षमा राखेर उपचार गर्नुपर्ने जानकारी दिनुभयो । बालकका बाबु सुवास परियारले घाउ हेर्दा निकै गम्भीर देखिए पनि शल्यक्रिया सफल भएको बताउनुभयो । उहाँका अनुसार बुधबार साँझ ५ः३० बजेको समयमा आँगनमा खेलिरहेका सुलभलाई चितुवाले लगेको थियो ।

घरभित्र र पिढीमा घरका अन्य सदस्यहरु भईरकोको समयमा चितुवाले लगेको उहाँको भनाई छ । चितुवाले ५० मिटर माथिसम्म पु¥याएको थियो । परिवारका सदस्यले हातगुहार गरेपछि चितुवा बालकलाई छोडेर भागेको सुवासले बताउनुभयो । बन्दीपुर गाउँपालिका वडा नं. १ का वडा सदस्य विजय रानाले गाउँमा पटक पटक चितुवाले आक्रमण गर्ने गरेको बताउनुभयो । नरभक्षी चितुवालाई नियन्त्रणमा लिन तीन वटा खोर र खोरमा बाख्रा, कुकुर राखेको भए पनि अहिलेसम्म खोरमा नपरेको बताउनुभयो ।

उहाँले भन्नुभयो “नरभक्षि चितुवा नियन्त्रणमा लिने प्रयास गरेका छौं अहिलेसम्म सफल हुन सकेका छैनौं ।” उहाँले चितुवालाई डार्ट गरेर नियन्त्रण गर्न विज्ञ समूह आवश्यक रहेको बताउनुभयो । चितुवाले बालकलाई आक्रमण गर्नु पूर्व साँझ करिब ५ बजेको समयमा सोही ठाउँका हेमबहादुर रानाको खसीलाई आक्रमण गरेर घाइते बनाएको थियो । रानाले होहल्ला गरेपछि भागेको चितुवाले पुनः गाउँमा पसेर परियारलाई आक्रमण गरेको थियो ।

घाइते परियारको बन्दीपुर गाउँपालिका–४ डुम्रेस्थित मोती हेल्थ क्लिनिकमा प्राथमिक उपचारपछि चितवन मेडिकल कलेज रिफर गरिएको थियो । केही महिनाअघि मात्रै बन्दीपुर–१ का ५ वर्षीय सुप्रिम बगालेको चितुवाको आक्रमणमा परी मृत्यु भएको थियो । उक्त घटनामा एक बालिकासहित दुईजना चितुवाको आक्रमणबाट घाइते भएका थिए ।

नेपाली बी–फार्मेसी विद्यार्थी सुप्रिया अधिकारीलाई मेटाबाट ३ हजार ७५० डलर पुरस्कार

सिएमसी अस्पतालमै दसैँको टीका, बिरामीका निधारमा खुसी र आँखामा भावुकता

जसले चाहेर पनि परिवारसँग दसैँको टीका लगाउन पाउँदैनन्