दाङ जिल्लाका लागि राष्ट्रिय राजनीतिमा भूमिका खेल्न सक्ने मानिसको आवश्यकता छ । किनकी एउटा सवल नेतृत्व राष्ट्रिय राजनीतिमा भूमिकाविहीन हुँदा जिल्ला हरेक कुरामा पछाडि पर्छ । गठबन्धनमा सहभागी दलको संयुक्त सरकारले बुटवल पु¥याएको प्रदेशको राजधानी जिल्लामै फर्काउन हाम्रो भूमिका रहेको हो । पछिल्लो पटक मात्रै म मुख्यमन्त्रीको भूमिकामा रहँदा दाङको विकासमा गरेको योगदान धेरै नै रह्यो । दाङमा रहेका भाइरल रोड, पानी मुनिका पुल भएको जिल्ला भनेर चिनिने जिल्ला आज पुलैपुलको जिल्लाका रुपमा चिनिन थालेको छ । हिजो रिफर सेन्टरका रुपमा चिनिने अस्पतालहरु अहिले दर्जन बढी विशेषज्ञ सेवासहितका अस्पताल घोराही र तुलसीपुरमा छन् । कोभिड विशेष अस्पताल, जिल्लामा प्राविधिक शिक्षा, कृषि आधुनिकीकरण, परम्परागत दामोदरमार्गको स्तरोन्नति यस्ता दर्जनौं विकासका काम छन् । त्यसकारण एमालेले सहज जित हासिल गर्छ । एमालेमात्रै राष्ट्रियता, विकास, समृद्धिका पक्षमा उभिन्छ भन्ने कुरा मतदाताले बुझिसकेकाले जित्ने आधार बलियो छ ।

चुनावमा तपाईलाई विश्वास गर्नुपर्ने कारण के के छन् ?

हामी आउँदा काम हुन्छ भन्ने कुरा पुष्टि गरेर जनतालाई देखाएकै छौं । हाम्रै नेतृत्वले वृद्ध भत्ता, सामाजिक सुरक्षा भत्ता, स्वास्थ्य विमा, सुत्केरी भत्ता, रोजगारमा आधारित सामाजिक सुरक्षा कोष ल्याएको हो । मुख्य कुरा राष्ट्रिय स्वाभिमान र स्वाधिनताको रक्षाका लागि एमालेलाई मत दिनुपर्छ । त्यसैगरी भूमिहीन, सुकुम्वासी, अव्यवस्थित बसोबासीलाई पूर्जा उपलव्ध गराउनका लागि, गुणस्तरीय शिक्षा र स्वास्थ्यमा सबै नागरिकको पहुँच स्थापित गर्नका लागि, जनताका आधारभूत आवश्यकता पूर्तिका लागि र समुन्नत दाङ निर्माण तथा समृद्ध नेपाल र सुखी नेपालीको आकांक्षा पूरा गर्न एमालेलाई मत दिनुपर्छ ।