काठमाडौँ  । नेपाली कांग्रेसको शुभेच्छुक संस्था सेन्टर फर डेमोक्रेटिक इन्जिनियर्स नेपाल (सिडेन) को अध्यक्षमा इन्जिनियर लक्ष्मण केसी निर्वाचित हुनुभएको छ । सिडेनको सातौँ कार्यकारिणी समितिका लागि शनिबार भएको निर्वाचनको केहीबेर अगाडि सम्पन्न मतगणनामा इन्जिनियर चेतनाथ पाण्डेलाई पराजित गर्दै केसी निर्वाचित हुनुभएको हो ।

अध्यक्ष केसीले एक हजार छ सय १९ मत र पाण्डेले एक हजार ६२ मत प्राप्त गर्नुभएको निर्वाचन अधिकृत शुक्रराज पौडेलले जानकारी दिनुभयो । यस्तै, उपाध्यक्षमा उमेश धिताल, महासचिवमा थमनबहादुर खड्का, उपमहासचिवमा सुशील लामिछाने र कोषाध्यक्षमा नवराज बस्नेत निर्वाचित हुनुभएको छ । यसैगरी, सदस्यमा उपेन्द्र महरान, राहुल मिश्र, जगदीश नेपाल, सन्दीप वाग्ले, नवीन बस्नेत, दीपक पौडेल, शेखरनाथ चापागाईं, सन्देश पन्त, अर्जुन बस्नेत, पद्मा अर्याल, अर्जुन रावल, मनोज वाग्ले र दुर्गा पन्थी विजयी हुनुभएको निर्वाचन अधिकृत पौडेलले बताउनुभयो ।

नवनिर्वाचित अध्यक्ष केसीले सन् २०१० मा संयुक्त राज्य अमेरिकाको मानोआस्थित हवाई विश्वविद्यालयबाट सिभिल र पर्यावरण इञ्जिनियररिङमा स्नातकोत्तर गर्नुभएको छ । उहाँ नेपाल एकीकृत अनुसन्धान तथा विकास प्रतिष्ठानको कार्यकारी निर्देशकसमेत हुनुहुन्छ । सन् २०१२ मा इन्जिनियर एन्ड प्लानर्स प्रालिको प्रबन्ध निर्देशक हुनुभएका उहाँले विश्व बैंकमा समेत काम गरिसक्नुभएको छ ।

नेपाल इञ्जिनियरिङ कलेजमा प्राध्यापनसमेत गर्नुभएका उहाँले विभिन्न इन्जिनियर संस्थामा रहेर काम गरिसक्नुभएको छ । सिडेनका संस्थापक नेता केसीले सन् २०१८ देखि २०२० सम्म केन्द्रीय उपाध्यक्ष भएर काम गरिसक्नुभएको थियो । केसी नेपाल इन्जिनियरिङ एसोसिएसनका पूर्वकेन्द्रीय सदस्यसमेत हुनुहुन्छ ।

सिडेनको सातौँ कार्यकारिणी समितिका लागि शनिबार सङ्घीय राजधानी काठमाडौँसहित सातै प्रदेशमा निर्वाचन भएको थियो । नवनिर्वाचित अध्यक्ष केसीले इन्जिनियरको हक, अधिकारका क्षेत्रमा काम गर्दै सिडेनलाई प्रविधिमैत्री बनाएर अगाडि बढ्ने बताउनुभयो । सिडेनको निर्वाचन प्रत्येक दुई वर्षमा हुँदै आएको छ ।

बिहीबारदेखि देशका विभिन्न क्षेत्रमा वर्षा हुने

विदेशी फूलको आयात रोक्न किसानको माग

अर्को साता वर्षाको सम्भावना, अहिल्यै त्रसित नहुन मौसमविद्को आग्रह