☰

भर्खरै

लोकप्रिय समाचार

भरतपुरका म्याद गुज्रेका सामान बेच्ने पसल बन्द

  •   बुधबार, असोज २८, २०७७ मा प्रकाशित
    • अ
    • अ
    • अ

    भरतपुर । म्याद गुज्रेका खाद्य तथा पेय पदार्थ बेचबिखन गर्दैआएको भरतपुरको एक पसललाई संयुक्त बजार अनुगमन टोलीले सिल गरेको छ । पसलमा ७० प्रतिशतभन्दा बढी सामान म्याद गुज्रेको भेटिएपछि पसलका सामान जफत गरी सिल गरिएको हो । भरतपुर विमानस्थलले चौविसकोठी नजिकै बनाएको व्यवसायीक सटरमा रहेको प्रसिद्धि भेराइटी पसललाई सिल गरिएको हो । पसलबाट विस्कुट, हर्लिक्स, जुस, कुरकुरे, कोक, पानी, रेडबुल, चक्लेट लगायतका सामान म्याद गुज्रेको पाइएपछि सबै समान जफत गरी पसल बन्द गराइएको छ । घरेलु तथा साना उद्योग कार्यालय चितवनका प्रमुख नारायण लम्सालले पसलले उपभोक्ताको स्वास्थ्यमाथि खेलवाड गर्दै म्याद गुज्रेका सामान बेचेको पाएपछि कारवाही गरिएको बताउनुभयो।

    अधिकाँस सामान म्याद गुज्रेको भेटिएपछि सिल गरिएको बताउनुभयो । चाडपर्व नजिकिएपछि जिल्ला प्रशासन कार्यालय, खाद्य प्रविधि तथा गुण नियन्त्रण डिभिजन कार्यालय, घरेलु तथा साना उद्योग कार्यालय लगायतको संयुक्त टोलीले बजार अनुगमनलाई तीव्र बनाएको छ । भरतपुर विमानस्थलको व्यवसायीक सटरमा सञ्चालित व्यवसायीक फर्म, फलफुल लगायतका पसल विना दर्ता सञ्चालन भएको भेटिएपछि तत्काल दर्ता प्रक्रियामा आउन निर्देशन दिएको उहाँले बताउनुभयो । अनुगमनका क्रममा सबैजसो पसलमा म्याद गुज्रिएको पेयपदार्थ तथा अन्य सामग्री बिक्री भएको भेटिएको खाद्य प्रविधि तथा गुण नियन्त्रण कार्यालय चितवनका प्रमुख घननाथ अधिकारीले बताउनुभयो  ।

    टोलीले चौबीसकोठीका एक दर्जन पसलबाट म्याद गुज्रेका सामग्री बरामद गरेको छ । उहाँले उपभोक्ता सचेत बनेर सामान खरिद गर्न समेत आग्रह गर्नुभयो । मूल्यसूची नराख्ने, बढी मूल्य लिने, मिसावट गर्ने, गुणस्तरहिन तथा म्याद गुज्रेका सामान बेचविखन गर्ने पसललाई कानुनी दायरामा ल्याइने बताउनुभयो । यसैबीच दराज अनलाइनका रुपमा अवैध रुपमा व्यवसाय चलाउदै आएको भरतपुर–१० कामना चोकको एक व्यवसायीलाई कार्तिक २ गतेसम्म आवश्यक कागजपत्र सहित घरेलु कार्यालय आउन निर्देशन दिइएको छ । वाणिज्य कार्यालयमा दर्ता विनै व्यवसाय चलाएको भेटिएपछि हाल व्यवसाय बन्द गर्न निर्देशन दिएको छ ।

    लोकप्रिय

    भर्खरै