असीम दुखको यस घडीमा प्रहरीको गोली प्रहारबाट ज्यान गुमाएका युवाहरुप्रति हार्दिक श्रद्धान्जली अर्पण गर्दै शोकाकुल परिवारमा समवेदना प्रकट गर्दछौं। प्रहरी दमनबाट ठूलो संख्यामा घाइते भएकाहरु एवं समाचार संकलनका क्रममा घाइते पत्रकारहरुको शीघ्र स्वास्थ्य लाभको कामना गर्दछौं। युवा पुस्ताको आजको यो आवाज २०६२/६३ को आन्दोलनपछिको व्यवस्थाले ल्याएको उपज हो। राष्ट्रिय प्रजातन्त्र पार्टीले अहिलेको व्यवस्थाले युवाको समस्या समाधान गर्न सक्दैन भन्दै विगत दुई दशक देखि संसद, सडक र विभिन्न समयमा गरिएका आन्दोलनमार्फत आवाज बुलन्द पार्दै आएको थियो। आज युवामाथि भएको राज्यको क्रुर दमनले अहिलेको व्यवस्थाको चरित्र मात्र देखाएको छैन यसले अब फेरि निर्णायक आन्दोलन नगरे युवा पुस्ताले फेरि दुख पाउने निश्चित छ।